Partizani përballet me Bylisin nesër në orën 13.45 në transfertë, në takimin e vlefshëm për Superioren. Në konferencën e zakonshme për shtyp përpara këtij 90 minutëshi ka folur trajneri i të kuqve, Ilir Daja.
Daja vlerëson maksimalisht ballshiotët, por beson tek të tijtë. Sa i përket blerjeve të reja, nuk përjashtohet mundësia që ndonjë prej tyre të aktivizohet nesër. Broja mund të largohet? Nëse vjen oferta e duhur.
“Të gjithë e dimë se merkato e janarit ofron shumë mundësi. Kemi shtuar rivalitetin në sulm dhe në mesfushë, ku ishim më mirë në organikë. Deshëm të fokusohemi te mbrojtësit, por nuk kemi rënë dakord me stafin dhe drejtorin e përgjithshëm për afrimet.
Kemi afruar lojtarë, por do ishim më të qetë nëse do dublonim pozicionet, që nuk e kemi bërë akoma edhe pas merkatos. Çdo përballje në të tilla kushte atmosferike, që degraduan edhe fushën e stadiumit të Elbasanit, më të mirit në Shqipëri përsa i përket fushës dhe ambientit.
Do presim terren jo të përshtatshëm në Ballsh, kështu do duhet të përshtatemi me të dhe të ndryshojmë manovrën. Bylisi është kundërshtar, që ka ndryshuar në këtë merkato. Do e studiojmë edhe gjatë lojës dhe do mundohemi të luajmë më shpirt dhe sakrificë për të marrë fitoren. Përderisa është mbyllur merkato, do të thotë se të gjithë skuadrën e kemi në dispozicion. Ndodh ndryshe vetëm nëse për secilin lojtar, jo vetëm për Brojën do të vijë një ofertë, që do plotësonte kushtet e klubit. Do ndiheshim të plotësuar nëse vjen një ofertë e tillë.
