Jeff Bezos ka vendosur të tërhiqet nga posti i shefit ekzekutiv të “Amazon”, duke hequr dorë nga drejtimi i kompanisë që themeloi vetë 27 vite më parë.
Bezos do të kalojë në rolin e kryetarit ekzekutiv në tremujorin e tretë të këtij viti, i cili fillon më 1 korrik, tha kompania sipas “NBC News”. Ndërkohë, Andy Jassy, shefi ekzekutiv i “Amazon Web Services”, do të marrë detyrën e CEO të kompanisë.
Nëpërmjet një letre drejtuar 1.3 milionë punonjësve të tij, 57-vjeçari u bëri me dije se një lëvizje e tillë nuk nënkupton kurrsesi se ai po del në pension, por veçse dëshiron të përqendrohet te pasionet personale, që përfshijnë hapësirën dhe problematikat e ndryshimeve klimatike.
Sipas tij, diçka e tillë do t’i falë kohën e duhur që të përqendrohet në “produkte dhe iniciativa të reja”.
“Nuk di kompani tjetër me një historik kaq të jashtëzakonshëm sa ‘Amazon’ dhe besoj se jemi në momentin më krijues. Shpresoj të jeni po aq krenar për krijimtarinë tonë, sa edhe unë. Duhet të jeni. Miliona klientë varen nga shërbimet tona dhe më shumë se një milion të punësuar paguhen nga ne.
Të jesh CEO i ‘Amazon’ është një përgjegjësi e thellë dhe konsumuese. Kur ke një përgjegjësi të tillë, është e vështirë të përqendrohesh diku tjetër. Si kryetar ekzekutiv, unë do të qëndroj i angazhuar në iniciativa të rëndësishme të ‘Amazon’, por gjithashtu do të kem kohën dhe energjinë e nevojshme për t’u përqendruar në ‘Blue Origin’, ‘Washington Post’ dhe pasionet e mia të tjera.
Unë kurrë nuk kam pasur më shumë energji se tani. Jam shumë i dhënë pas ndikimit që mendoj se mund të kenë këto organizata. Unë e shoh punën time domethënëse dhe argëtuese.
Punoj me skuadrën më të zgjuar, më të talentuar. Kur kohët kanë qenë të arta, ju keni qenë modestë. Kur kohët kanë qenë të vështira, ju keni qenë mbështetës dhe ne e kemi bërë njëri-tjetrin të qeshë. Është një gëzim të punosh me këtë ekip.
Vazhdoni të shpikni / krijoni dhe mos u trishtoni kur në fillim ideja tingëllon e çmendur. Le të jetë kurioziteti busulla juaj” – përfundoi Jezos.
