Nga BoldNews.al
Kryetari i Bashkisë së Vlorës, Dritan Leli, ka vendosur të mos fshihet më.
Ai ka vendosur të shpenzojë 250 milionë lekë të vjetra nga taksat e qytetarëve vlonjatë për të shtruar asfalt elektoral, të cilit i del “boja shumë shpejt”.
Dhe, këtë investim, e kryen pa asnjë brerje ndërgjegjeje, mjafton që të plotësojë dëshirën e kryeministrit Edi Rama, i cili është i pari në listën e deputetëve të Partisë Socialiste në qarkun e Vlorës.
Në 26 janar 2021, Bashkia ka shpallur tenderin “Rehabilitimi dhe riasfaltimi i disa akseve rrugore në qytetin e Vlorë”.
Sipas njoftimit të tenderit, rezulton se Bashkia e Vlorës kërkon nga operatori fitues që të mbyllë punimet brenda dy muajve, pra, saktësisht në kohën e zgjedhjeve të përgjithshme të 25 Prillit 2021.
“Boldnews.al” konsultoi dokumentat e procedurës, nga ku konstatohet lehtësisht se fondi prej 25 milionë lekë të reja do të përdoret për punime aspak thelbësore, por vetëm për fasadë, të cilat nuk kanë qëndrueshmëri.
Sipas Bashkisë së Vlorës, do të ndërhyhet në Rrugën “Onufri” me mbushjen e disa gropave me çakëll dhe riasfaltim i tyre, si edhe vijëzimi i rrugës.
Në rrugën “Mato Robi” do të kryhet për mbushje pjesërisht me çakull, stabilizant dhe asfaltim i pjesëve të dëmtuara, si edhe vijëzim i tyre. Në dokumentat e tenderit konstatohet se rruga është e sistemuar, por ka nevojë për mirëmbajtje në disa vende, në një segment prej 100 metrash.
Po ashtu, do të ndërhyhet me vijëzim edhe në disa rrugë të tjera të qytetit.
Duket qartë se gjithçka shërben vetëm për dukjen, për aparencën e rrugëve në periudhën paraelektorale.
Ndërhyrjet e menduara nga Bashkia e Vlorës nuk u japin zgjidhje problematikave të theksuara që kanë rrugët e qytetit, por edhe ato periferike që lidhen me qendrën.
Prej shumë vitesh, zonat rurale pranë në Bashkinë e Vlorës vuajnë mungesën e një qarkullimi normal rrugor.
Madje, në periudha reshjesh atmosferike, një pjesë e mirë e zonave në lumin e Vlorës mbeten të bllokuara për shkak të mungesës së rrugëve dhe vërshimit të ujit në rrugicat e fshatrave.
