Përqindja e pozitivitetit në rastet e testuara gjatë kësaj jave ka shkuar duke u rritur nga 24-28% dita-ditës.
Përpos neglizhencës për zbatimin e masave anti-COVID, rritja e rasteve në vendin tonë lidhet dhe me uljen e temperaturave.
Kështu e shpjegon situatën e fundit epidemiologu Ilir Alimehmeti, i cili flet dhe për klinikën e re që po shfaq virusi.
Për të pasur një fushatë të vërtet vaksinimi duhet të kemi të paktën 5000 vaksinime në ditë thotë Alimehmeti.
Epidemiologu Ilir Alimehmeti tregon se një ndër arsyet kryesore të rritjes së rasteve me COVID-19 është ulja e temperaturave.
“Patjetër që një nga arsyet kryesore janë dhe temperaturat e ultë për vet logjikën tek virusi por dhe për faktin që ne si njerëz, duke qenë më ftohtë qëndrojmë më shumë brenda, jemi më shumë me njëri-tjetrin, imuniteti jonë bie, ajrosja nuk është aty ku duhet sepse kur është ftohtë jashtë nuk mund të ajrosësh shumë, pra ka shumë elementë. E dyta sepse vet virusi mbijeton më shumë në temperatura më të ftohta, ne këtë e dimë”-thotë epidemiologu Ilir Alimehemeti.
Alimehmeti thotë se ka një ndryshim dhe në klinikën që virusi po shfaq tek të prekurit, duke mos përjashtuar mundësinë e prezencës së variantiteve të reja të COVID në vendin tonë.
“Ka një klinikë që ka filluar ti ngjajë më shumë gripit që do të thotë fillon menjëherë me një temperaturë të lartë mbi 39 që zgjat disa ditë dhe fillon bie drejt zgjidhjes. I ngjanë shumë më tepër gripit, është COVID kjo s’ka asnjë diskutim kjo shihet dhe me shenjat e skanerit por ka filluar ti ngjajë. Është një përqindje e ulët, nuk dominon por kanë filluar dhe raste të këtij tipi”-shpjegoi Alimehmeti.
Sa i përket vaksinimit në Shqipëri, ai thotë se nëse nuk bëhen 5000 të tilla në ditë nuk kemi një fushatë të vërtetë. Për rastet e riinfektimit në vendin tonë, epidemiologu shpjegon se kanë qenë shumë të pakta.
“Për të filluar mund të ishte dhe 5000 vaksinime, llogaria e thjeshtë janë 2500 veta në ditë, se duhen dy herë, shumëzim për 365 ditë, janë 912 mijë vetë. Dhe ne personat mbi 50 vjeç i kemi 977 mijë në Shqipëri, pra pa një pesë mijëshe ditore nuk kemi një fushatë të vërtet”.
“Duhet të jetë shumë më e madhe në fakt sepse duhet të jetë intensive jo e zvarritur. Kjo është arsyeja pse sjell dhe ai kalkulimi 14, 18 dhe 24 muaj ndoshta. Thjesht nuk ia dalin dot, mund të duam të gjuajm me breshëri por nuk kemi municione atëherë gjuajmë me pushk teke” – tha epidemiologu Alimehmeti.
