Ndërsa volejbolli nxitoi të publikojë dhe nisë menjëherë sezonin e ri sportiv 2020-2021 (13 shkurt), Federata Shqiptare e Basketbollit ende nuk ka ndërmarrë një nismë të tillë.
Madje, përmes një shkrese dërguar klubeve, FSHB shprehet se do të jenë klubet ato që do të vendosin për datën e fillimit të veprimtarive sportive dhe formulën e zhvillimit të kampionatit. Federata do të presë sugjerime deri më 5 shkurt.
Gjithsesi, me shumë gjasa, kampionati do të nisë në mars, pasi më datat 18 dhe 20 shkurt, kombëtarja e meshkujve do të luajë dy ndeshjet e saj të fundit në fazën para-eliminatore të Eurobasket 2023 (në Qipro).
Siç dihet, në Shqipëri nuk zhvillohen aktivitete të basketbollit që prej marsit 2020, kur dhe nisi pandemia Covid-19. Paralelisht me kërkesat e mësipërme, FSHB u ka dërguar klubeve dhe masat udhëzuese anti-Covid që do të zbatohen. /Telesport
