Pandeli Majko, ministër për Diasporën, tha mbrëmjen e sotme në “Open” se përgjegjësia lidhur me votimin e emigrantëve në zgjedhjet e 25 prillit nuk është e PS-së, por e KQZ.
Majko tha se KQZ duhet të zbatojë ligjin në mënyrë që emigrantët të votojnë. Ai tha se ekziston mundësia për votimin online dhe votim me postë.
“KQZ të zbatojë ligjin. Skemi nevojë të shpikim ndonjë filozofi. 3 orë larg është Prishtina dhe aty po votohet me postë. Ka mundësi votimi me postë ose online”, tha Majko.
Në fakt socialistët prej vitit 2013, kohë kur erdhën në qeverisjen e vendit, premtuan se do të realizonin votimin e emigrantëve. Prej nga kjo kohë kanë kaluar 8 vite, ndërsa ndryshimet ligjore që mundësojnë të drejtën e votës së emigrantëve, nga vendet ku jetojnë dhe punojnë, janë miratuar në 2016.
Nga momenti që ligji u miratua në Kuvend, askush nuk e ka penguar Qeverinë që përmes instrumenteve të saj, Kuvendin që ka një shumicë të socialistëve, apo Qeverinë ku bën pjesë sot Pandeli Majko, që të avanconin procesin.
Nga 2016 deri më sot kanë kaluar pothuajse 5 vjet, që do të thotë që nëse Pandeli Majko si ministër i Diasporës, apo Qeveria ku bën pjesë do të kishin vullnet, atëherë, do të dihej sot se sa shqiptarë jetojnë jashtë vendit, ku jetojnë, dhe më pas të pretendohej për hartimin e akteve ligjore që do të mundësonin votimin.
Sot ministri i Diasporës u përpoq që gjithë përgjegjësinë lidhur me dështimin e këtij procesi, jo për shkak mungese vullneti nga opozita, por qartazi për mungesë vullneti nga Qeveria dhe PS, t´ia faturojë KQZ dhe opozitës, që sipas tij nuk jep konsensusin.
Minimalisht Majko sot duhet të jepte argumente nëse kishte sepse nga 2016 deri në 2021 Qeveria ku ai bën pjesë, përmes institucioneve që varen po prej saj, nuk kreu procesin e regjistrimit të shtetasve shqiptarë me vendbanim jashtë Shqipërisë.
Gjithashtu nuk dha asnjë sqarim sepse nuk u siguruan kushtet për votimin elektronik të këtyre qytetarëve, përderisa Kushtetuta i jep të drejtën shtetasve shqiptarë që të votojnë.
Edhe justifikimet që ngre ministri i Diasporës, mbi atë se Shqipëria u godit nga 3 tërmete, një në Korçë dhe dy në aksin Tiranë-Durrës, por edhe nga pandemia, nuk qëndrojnë, përderisa mund të garantohej regjistrimi apo deklarimi i vendbanimeve të qytetarëve jashtë vendit përmes aplikimeve online.
E gjitha kjo duket si një tallje që sot ministri Majko bëri me shqiptarët jashtë vendit, ndërsa kjo i shtohet listës së gjatë të mashtrimeve të Rilindjes në 8 vite.