Sekretari i Përgjithshëm i PD, Gazment Bardhi ka reaguar pas deklaratës së kryeministrit Edi Rama, lidhur me kandidatët e inkriminuar, për të cilët ambasadorja e SHBA, Yuri Kim ka kërkuar të lihen jashtë listave.
Rama u shpreh paradite se përgjegjësia është individuale, duke hequr përgjegjësinë nga kryetarët e partive që kandidojnë të tilla figura.
Numri dy i PD, Gazment Bardhi e konsideron deklaratën e Ramës të turpshme dhe të dëmshme njëherazi për vendin në arenën ndërkombëtare.
Reagimi
Përgjigja e Ramës ndaj kërkesës së SHBA-ve që partia e tij të mos përfshijë kriminelë në lista- është e turpshme dhe e dëmshme. Edhe një herë Rama e turpëroi Shqipërinë dhe dëmtoi statusin e saj ndërkombëtar.
Pas 8 vitesh në të cilat Rama shkatërroi ekonominë dhe vendin tonë, tani ai po shkatërron edhe marrëdhëniet tona me Shtetet e Bashkuara të Amerikës dhe Bashkimin Evropian.
Për të sjellë ndryshimin dhe një të ardhme më të mirë në Shqipëri, ne duhet të largojmë Ramën – dhe kjo është pikërisht ajo që populli shqiptar do të bëjë në 25 Prill!
