Një sasi heroine dhe mbi 6 milionë lekë të vjetra janë sekuestruar nga policia e Durrësit në aksionin e koduar “Last Time”, që çoi edhe në arrestimin e dy personave.
F.S., 27 vjeç, i dënuar më parë për veprat penale “Vjedhja” dhe “Prodhim dhe shitja e narkotikëve” dhe A.D., 41 vjeç, të dy banues në Durrës, janë vënë në pranga.
Procedimi për rastin ka nisur më herët gjatë këtij muaji, ndërsa hetimet janë zhvilluar me metoda speciale.
Arrestimi
Shërbimet e Policisë kanë kapur A.D., ku gjatë kontrollit fizik, i’u gjetën disa doza me heroinë të cilat po ja jepte F.S., me qëllim shitjen e tyre.
Burime zyrtare bënë me dije se, në vijim të operacionit, gjatë kontrollit të ushtruar në banesën e A.D., policia gjeti qindra doza të tjera me heroinë, gjthësej 223 gr., fishekë luftarak, 1 peshore elektronike dhe 640.000 lekë të reja të përfituara nga shitja e lëndës narkotike, të cilat u sekuestruan në cilësinë e provës materiale.
Nga hetimet e kryera rezulton se këta dy persona, në bashkëpunim me njëri-tjetrin, ushtronin këtë aktivitet të jashtëligjshëm duke shitur lëndë narkotike në sasi të mëdha dhe doza të vogla, me qëllim përfitimin e vlerave monetare.
“Materialet i kaluan Prokurorisë së Rrethit Gjyqësor Durrës për veprat penale ‘Prodhim dhe mbajtje të municioneve luftarake’ dhe ‘Prodhim dhe shitja e narkotikëve’ kryer në bashkëpunim, ndërsa vijon puna për identifikimin e personave të tjerë të përfshirë në këtë veprimtari kriminale”, njoftoi policia.
