Kryeministri Edi Rama u pyet sot nga një dedagoge, gjatë një bashkëbisedimi në Korçë, nëse është në planin e qeverisë rritja e pagave për punonjësit e Arsimit të Lartë.
Rama tha se është në planin e tyre, por duket se jo në një afat të shkurtër, pasi duhen studiuar pasojat afatgjata që sjell në buxhet.
Duke analizuar premtimet e Bashës për rritjen e pensioneve dhe uljen e pagesës së sigurimeve shoqërore, Rama tha se guximin e tij do ta kishte zili edhe Sudja.
“Rritja e pagave nuk është çështje dëshire, dhe nuk duhet të jetë në asnjë mënyrë çështje motivimi elektoral apo politik, në dëm të qendrueshmërisë së financave. Kur ne vendosëm që të rrisnim 40% pagat e mjekëve dhe infermierëve, duke i çuar në një nivel që nuk e mendonin as ata, kemi pasur parasysh që kjo është për të gjithë kohën, duhet që llogaria të bëhet në afatgjatë.
Mund të bëhet një llogari si nga ana tjetër, që thanë se do të ulin sigurimet, dhe do të rrisin pensionet, duke i bërë Shqipërisë një fundosje që edhe Sudja do e shihte jashtë kurajos së saj. Po pastjetër, jam shumë i vetëdijshëm, që objektivi i radhës është që pagat e pedagogëve të rriten,dhe ata të kenë të gjitha arsyet të mendojnë se me herët se vonë do të jenë në nivelin e kolegëve të tyre të vendeve të rajonit.”, tha Rama.
