Kastriot Dema, i riu i cili qëlloi me thikë ish-gruan e tij se po bënte shumë zhurmë teksa po festonte ditëlindjen, është arrestuar nga ana e uniformave blu, njoftoi sot policia.
Referuar burimeve zyrtare, Dema, 32 vjeç, banues në Rrogozhinë ka thyer masën e ‘Arrestit në shtëpi’, duke dhunuar ish-gruan, Charlote (shtetase italiane) dhe e qëlluar me thikë në zonën e parakrahut, fatmirësisht të lënduar lehtë. Ndërkohë, duke iu referuar të njëjtave burime, janë proceduar ne gjendje të lirë G. B dhe F. V.. Policia thotë se këta të fundit kanë ndërhyrë në konflikt, por Dema ka pretenduar se këto janë shokët e gruas dhe e kanë rrahur atë.
Gruaja Charlote ka marrë urdhër mbrojtje, njofton policia.
“Specialistët për Hetimin e Krimit në Komisariatin e Policisë Kavajë, bënë arrestimin në flagrancë të shtetasit K. D., 32 vjeç, banues në Rrogozhinë. Arrestimi i këtij shtetasi u bë pasi duke thyer masën e sigurisë “Arrest në shtëpi” gjatë një konflikti për motive të dobëta ka ushtruar dhunë fizike dhe psikologjike ndaj ish-bashkëshortes së tij e cila u pajis me Urdhër të Menjëhershëm të Mbrojtjes.
Në vijim të veprimeve u proceduan penalisht në gjendje të lirë edhe shtetasit G. B dhe F. V., pasi kanë ndërhyrë gjatë konfliktit nëpërmjet shtetasve të lartpërmendur duke goditur shtetasin K. D., i cili ndodhet në spital, jashtë rrezikut për jetën. Materialet i kaluan Prokurorisë pranë Gjykatës së Shkallës së Parë së Rrethit Gjyqësor Kavajë, për veprat penale “Dhuna në familje” dhe “Largim i të burgosurit nga vendi i qëndrimit” në ngarkim të shtetasit K. D (i arrestuar) dhe për veprën penale “Plagosje e lehtë në bashkëpunim” në ngarkim të shtetasve G. B dhe F. V, të proceduar në gjendje të lirë”, njofton policia.
Charlote ka qenë duke festuar ditëlindjen në dhomën e saj në hotel me disa të ftuar. Ish-bashkëshorti i Charlote ndodhej gjithashtu në hotelin në pronësi të tyre, por në dhomë tjetër dhe i dënuar me masën e sigurisë “arrest shtëpie”, për dhunë në familje. Ai u ka kërkuar të ftuarve të bashkëshortes dhe vetë asaj që të mos bënin zhurmë gjatë festës. Ndërkohë në debat e sipër janë konfliktuar me njëri-tjetrin. Si pasojë e konfliktit burri ka marrë një thikë dhe e ka qëlluar, por për fat të mirë e ka plagosur në dorë dhe nuk i ka shkaktuar probleme. Dema së bashku me ish- gruan e tij kanë një resort në këtë zonë. Prej kohësh italiania kishte urdhër mbrojtje nga policia pasi burri i saj e dhunonte herë pas here.
