Komisioni i Pavarur i Kualifikimit ka shtyrë sot seancën dëgjimore për subjektin e rivlerësimit Gramoz Levanaj, gjyqtar në Gjykatën e Apelit Tiranë.
Lajmi bëhet i ditur nga Komisioni i Pavarur i Kualifikimit i cili njofton se seanca dëgjimore për subjektin e rivlerësimit, Gramoz Levanaj, e përcaktuar për t’u mbajtur sot, nuk do të zhvillohet.
Komisioni vendosi ta shtyjë seancën dëgjimore, pasi në datë 27.1.2021, subjekti i rivlerësimit. Gramoz Levanaj, ka paraqitur raport mjekësor për arsye shëndetësore.
Gramoz Levanaj, gjyqtar në Gjykatën e Apelit Tiranë do të përballej sot me tri kritere e vlerësimit, atë të ligjshmërisë së pasurisë, kriterin etik dhe profesional, por raporti mjekësor detyron KPK të shtyjë seancën.
Gramoz Levanaj e ka filluar karrierën në sistemin e drejtësisë në vitin 1995 dhe ka punuar përgjatë një dekade si gjyqtar dhe kryetar gjykate në Kurbin. Prej vitit 2010, Levanaj e ushtron funksionin në Gjykatën e Apelit të Tiranës.
