Gjykatësi i procedurës paraprake i Dhomave të Specializuara të Hagës, Nicolas Guillou, refuzoi kërkesën e ish-presidentit të Kosovës, Hashim Thaçi, për lirim të përkohshëm.
Thaçi ndodhet në objektet e paraburgimit në Hagë që prej fillimit të nëntorit, kur është arrestuar nën akuzat për krime lufte dhe krime kundër njerëzimit.
Mbrojtja e tij e ka paraqitur kërkesën për lirim të përkohshëm më 4 dhjetor.
Në njoftimin e publikuar nga Dhomat e Specializuara të Kosovës, refuzimi i kërkesës për lirimin e përkohshëm të Thaçit bazohet në Nenin 41(6)(b) të Ligjit.
Ky nen, mes tjerash, përfshin: rrezikun nga arratisja, rrezikun nga shkatërrimi, fshehja, ndryshimi ose falsifikimi i provave, si dhe rrezikun e përsëritjes së veprës penale.
Gjykatësi i procedurës paraprake ka konfirmuar aktakuzën për krime lufte dhe krime kundër njerëzimit ndaj katër ish-udhëheqësve të Ushtrisë Çlirimtare të Kosovës: Hashim Thaçi, Kadri Veseli, Rexhep Selimi dhe Jakup Krasniqi.
Të gjithë ata ndodhen në paraburgim në Hagë dhe janë deklaruar të pafajshëm.
