Katër persona, pronarë të një agjencie udhëtimesh, janë arrestuar nga policia e Tiranës, të akuzuar për veprat penale penale “Mashtrimi“, “Falsifikimi i dokumenteve”, “Fshehja e të ardhurave” dhe “Mospagimi i taksave dhe tatimeve”.
Burime zyrtare nga blutë e Tiranës njoftuan këtë të Mërkurë se seksioni për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë e Rrethit Gjyqësor Tiranë, bazuar në informacionet e marra në rrugë operative dhe elektronike, ka organizuar dhe finalizuar operacionin policor të koduar “Shtegtimi”. Si rezultat i të cilit është bërë arrestimi në flagrancë i shtetasve: Ergys Vejseli, 34 vjeç, Gentiana Konini, 44 vjeçe, Klotida Çela, 32 vjeçe dhe Petrit Cara, 37 vjeç, të katërt banues në Tiranë, me aktivitet tregtar biznes privat agjenci udhëtimi.
Sipas të njëjtave burime, këta shtetas, në bashkëpunim me njëri-tjetrin, duke përfituar nga situata e pandemisë COVID-19, nëpërmjet kamuflimit, për t’u mundësuar udhëtarëve të ndryshëm vajtjen në vendet e BE-së, kryesisht në Gjermani, kanë përfituar shumën 600 euro për person, duke shmangur detyrimet tatimore, si dhe kanë falsifikuar formularë të testit “COVID-19” dhe garanci të destinacionit të vendit pritës.
