Vodhi pacientin që vdiq nga koronavirusi, arrestohet infermierja e “Covid1”

U desh një denoncim publik nga djali i një prej pacientëve të shtruar në “Covid1”, që më pas humbi jetën, që policia të vinte në pranga autorin e një tjetër skandali në spitalet Covid.

Disa ditë më parë, një emision investigativ televiziv transmetoi dëshminë e një të riu, i cili shprehej se i ati, pasi ishte shtruar në spitalin “Covid1”, ishte vjedhur. Ai tha se e kishte denoncuar rastin edhe në polici, por akoma pa rezultat.

Vetëm pas trasmentimit të skandalit në emisionin televiziv, policia duket se është vënë në lëvize, duke vënë në pranga personin përgjegjës të vjedhjes së pacientit të shtruar të “Invektivi”. Ajo është një infermiere 30 vjeçe, e cila tanimë akuzohet për veprat penale: “Vjedhja” dhe “Vjedhja duke shpërdoruar detyrën”.

Arrestimi

“Specialistët për Hetimin e Krimit në Komisariatin e Policisë Nr. 4, në bashkëpunim me Prokurorinë e Rrethit Gjyqësor Tiranë, kanë bërë të mundur identifikimin, lokalizimin dhe ndalimin e shtetases Ronida Hysa, 30 vjeçe, banuese në Durrës. Ndalimi i kësaj shtetaseje u bë pasi në bazë të pamjeve filmike rezulton si autorja e vjedhjes së një shume parash në portofolin e shtetasit K.D., i cili ka qenë i shtruar në spitalin infektiv, ku ka ndërruar jetë nga COVID-19”, njoftoi policia këtë të Martë.

“Pas kallëzimit të bërë për këtë ngjarje, nga djali i të ndjerit, shtetasi F. D., 25 vjeç, i cili ka deklaruar se nga llogaria bankare e të atit ishte tërhequr shuma 60.000 lekë, specialistët për Hetimin e Krimit në Komisariatin e Policisë kanë organizuar punën për identifikimin e autorit.  Në bazë të provave filmike ka rezultuar se edhe shuma e parave është tërhequr nga shtetasja Ronida Hysa, infermiere në spitalin infektiv, e cila ka pranuar autorësinë e ngjarjes, që është bërë mediatike edhe nga emisioni investigativ ‘STOP’”, shtuan të njëjtat burime.

Dëshmia e djalit të pacientit

Në dëshminë e tij për emisionin investigativ, djali i pacientit i cili humbi jetën nga koronavirusi shprehej:

“I jam drejtuar emisionit Stop për një skandal që ka ndodhur tek QSUT, tek Infektivi. Më datë 22 është shtruar, në datë 23 unë kam folur me babain dhe tha jam mirë. Më datë 24 e ditët në vazhdim unë me babain nuk kam folur më, ja kanë marrë telefonin dhe nuk kam patur asnjë kontakt me babain. Dhe më datë 27 ka ndërruar jetë. Dhe erdhi funerali te shtëpia, bëmë adetin, pritëm e përcollëm njerëz, hapa gjërat personale të babait dhe aty shoh që në portofol mungonte karta e bankës dhe 200 mijë Lekë të vjetra që ka pasur në portofol. Unë ia kam vendosur babait tim 200 mijë Lekë në portofol dhe kur e kam hapur portofolin për të vendosur lekë, kam parë dhe kartën e bankës aty, por nga stresi që kisha nuk kam guxuar ta heq. Por kur humbi jetën, kam kontrolluar portofolin dhe shoh 2 mijë Lekë të vjetra dhe kartën e bankës dhe kodin që nuk ishte aty. Sendet e tjera, kartë identiteti dhe patenta aty ishin. Karta e bankës dhe password-1 nuk ishin aty. Nuk më intereson sa lekë është vjedhur, mua më intereson gjesti që është bërë. Doktori, infermieri, pastruesja apo ku e di unë kush ka qenë aty, personali i spitalit… Kam marrë doktoreshën dhe i kam thënë i ka humbur babait karta e bankës dhe më ka thënë nuk është e drejta ime, mos m’i bjer më telefonit se po bëj shopping (pazar). Nuk është problemi im pse ia kanë vjedhur babait tënd kartën e bankës. Unë jam infermiere dhe kaq dhe ma ka fikur telefonin. Te policia kam bërë denoncim dhe më kanë thënë do e kemi parasysh, po s’e kur do zgjidhet nuk e di. Prandaj i jam drejtuar emisionit Stop, që ta bëj publike dhe të gjendet personi”.

Rast i përsëritur

LEXO EDHE  Koronavirusi/ Mjeku shqiptar në Gjermani: Shqetësuese ajo që po ndodh me pandeminë në Shqipëri

Më herët, i njëjti emisione televiziv tregoi se si sanitarja Tire Alldervishi e cila punonte në spitalin Covid 2, zhvati nga paratë vajzën e një pacienteje me koronavirus, e cila po ashtu humbi jetën. Alldervishi aktualisht është pas hekurave, pasi ndaj saj gjykata vendosi masën e arrestit me burg.

Pas ditë më parë, në media është raportuar se ka pasur një shtim të denoncimeve në komisariatet e Tiranës, të rasteve të vjedhjes së pacientëve të shtruar në spitalet Covid.