Reshjet e dendura të shiut që nisën mbrëmjen e djeshme e vijuan deri në orët e para të mëngjesit të sotëm, kanë krijuar një situatë alarmante në bashkinë e Shijakut.
Lagjja “Erzeni”, që prej orëve të para të mëngjesit të sotëm, është nën pushtetin e ujit, pasi për shkak të reshjeve të dendura të shiut gjatë orëve të natës, lumi Erzen ka dalë nga shtrati, duke përmbytur disa biznese dhe shtëpi në katet e para të tyre.
Bëhet fjalë për 13 familje të izoluara në njërën anë të shtratit të lumit dhe 6 familje në anën tjetër.
Sakaq, alarmante mbeten prurjet e vazhdueshme të lumit pasi niveli i ujit është rritur ndjeshëm.
Pavarësisht se kjo zonë mbetet një zonë me potencial të lartë për përmbytje, askush nuk ka ndërhyrë për të marrë masat e nevojshme në mënyrë që kjo ngjarje të shmangej.
Në një prononcim për mediat, kryetari i bashkisë Shijak, Elton Arbana, u shpreh se shtabi i emergjencave ndodhet në gadishmëri për stabilizimin e gjendjes.
Megjithatë mesa duket situata nuk është aspak normale pasi një përmbytje të tillë kjo zonë e Shijakut nuk e ka parë që prej vitit 2016.
