Këngëtarja Anxhela Peristeri u shpall fituese e Festivalit të 59 të RTSH-së. “Karma” është titulli i këngës që do të përfaqësojë Shqipërinë në “Eurovision”. Ky i fundit do të mbahet në maj të vitit 2021 në Rotterdam.
Gjatë kohës kur ishin prezantuar këngët konkurruese, në media qarkulloi një lajm jo zyrtar për fitoren e “paracaktuar” të këngëtares Peristeri, lajm i cili u mohua kategorikisht nga drejtori i Festivalit të RTSH-së, Martin Leka, si dhe nga Anxhela.
Lidhur me fituesen ka patur shumë reagime, ku pakënaqësitë i kanë treguar hapur dy këngëtaret Enxhi Nasufi dhe Rosela Gjylbegu. Ato të dyja treguan se nuk ishin dakord me këtë rezultat.
Ndërkohë e ftuar në “Jonida’s Room”, Anxhela foli për herë të parë lidhur me këto fjalë. Këngëtarja u shpreh se në fakt ka pasur reagime jo vetëm për të, por edhe për çmimin e dytë dhe të tretë. Pavarësisht kësaj, këngëtarja e njohur tregoi se dëshiron që të ketë reagime sa herë që fiton, nuk e ka aspak problem dhe e kupton këtë gjë.
