Legjenda e televizionit amerikan Larry King është ndarë nga jeta në moshën 87-vjeçare. Ai ishte shtruar në spital në fillim të muajit janar me simptoma të koronavirusit.
Gazetari vuante edhe nga diabeti. Në të kaluarën ai kishte probleme serioze në zemër dhe në vitin 2017 u operua nga kanceri i mushkërive. Vitin e kaluar, ai humbi dy fëmijë, Andy dhe Chaia, në pak më shumë se tre javë. I pari vdiq nga një atak në zemër më 28 korrik, ndërsa i dyti vdiq në 20 gusht nga kanceri i mushkërive.
King kishte një karrierë në gazetari prej 63 vitesh. Ai ka bërë me mijëra intervista në karrierën e tij gazetareske. Pothuajse të gjithë njerëzit me peshë në politikën amerikane dhe botërore janë intervistuar nga King.
Emisioni i tij në CNN “Larry King Live” per 25 vite ishte më i ndjekuri në televizionet amerikane. Më pas ai ka pasur programin e tij në Ora Media, që ka qenë media e tij, “Larry King Now”. Gjithashtu ai ka drejtuar edhe emisionin “Politicking with Larry King”. Të treja emisionet e tij kanë pasur numër rekord shikuesish dhe shperndarje në mediat online.
