Nga Elton Laska
“Ejani në Shqipëri se nuk kemi sindikata” Ishte ky apeli i Kryeministrit, Edi Rama për investitorët italianë në 2014 në përpjekjen e tij për t’i joshur për të sjellë sipërmarrjet e tyre në vendin tonë.
Kjo thirrje sigurisht që nuk u mor për bazë nga sipërmarrësit serioz italian, të regjur me peripecitë e të bërit biznes në vëndet ish-komuniste.
Ftesës ndërkohë vendosën t’i përgjigjen pozitivisht sipërmarrësit e vendit fqinj të lidhur me mafian dhe ish zyrtarët dhe politikanët e korruptuar, që tek Shqipëria shohin potenciale për të pastruar paratë e përfituara në rrugë të paligjshme.
Megaoperacioni i policisë së Katanzaros në Itali që u finalizua në 21 janar 2020 me prangosjen e disa pjesëtarëve të Ndragheta-s, politikanëve, zyrtarëve shtetëror të korruptuar dhe biznesmenëve që pastronin paratë e mafias ka zbuluar se disa prej tyre kanë pasur plane të gatshme investimi në Shqipëri, madje kanë themeluar edhe kompani.
“Duhet të paguash një person të vetëm në nivel Ministrie e vetëm tek njëri aman”
Kështu shprehet në një bisedë të përgjuar nga autoritetet italiane ish-funksionari i Guardia di Finanza-s, Ercole D’Alessandro, i cili i pohonte politikanit Italian ,Tomaso Brutto, se mund të shfrytëzojnë edhe eurodeputetin, Lorenzo Cesa, për të siguruar lidhje në Shqipëri, një vend ku sipas tyre korrupsioni është si çelësi kopil, që hap çdo derë.
Politikani italian Tomaso Bruto dhe i biri sipas dosjes hetimore rezulton të kenë pasur iniciativë konkrete për të nisur një sipërmarrje në Shqipëri, konkretisht në tregtimin e materialeve për parandalimin e aksidenteve, teksa pjesë në këtë sipërmarrje do ishte edhe biznesmeni i arrestuar në kuadër të operacionit “Basso profile”, Antonio Gallo, që mban nofkën “Princi” e që në Itali u njihka për lidhjet me klanin mafioz Ndragheta.
Autoritetet italianë vijojnë hetimet lidhur me këtë skemë korrupsioni me vlerë 250 milionë euro, ndërkohë në pranga kanë përfunduar edhe 7 shqiptar (sipas medias).
Nuk ka informacion nëse autoritetet shqiptare kanë nisur një hetim paralel, ose janë përfshirë në hetimet e palës italiane, teksa indiciet për hapjen e një dosje hetimore janë të mjaftueshme edhe kryesisht nga çdo prokuror i SPAK.
Ndërtimi është sektori i preferuar i bandave shqiptare që operojnë në trafikun e lëndëve narkotike në Evropë për të pastruar paratë, por deri më sot autoritetet shqiptare nuk kanë nisur një hetim serioz. A po investon mafia italiane në sektorin e ndërtimit në Shqipëri? Kjo pyetje duhet të na shqetësojë.
Paratë e krimit të organizuar të injektuara pa kontroll në ekonomi nuk sjellin zhvillim, thjeshtë prodhojnë më shumë krim dhe korrupsion.
Nga Italia fqinje mësuam si t’i krijojmë dhe menaxhojmë bandat kriminale, por nuk ishim të vëmendshëm në leksion për të mësuar si t’i luftojmë ato.
