Urdhri i parë që Presidenti i zgjedhur i Shteteve të Bashkuara Joe Biden ka në plan që të nënshkruajë do të jetë ai për mbajtjen e maskave me detyrim në të gjithë vendin.
Kjo është një shenjë e një kthese 180 gradëshe që administrata e re do të marrë në lidhje me pandeminë.
“Ky urdhër ekzekutiv do të drejtojë agjencitë e ndryshme në vend që të ndërmarrin hapa për të kërkuar me detyrim zbatimin e udhëzimeve të CDC për mbajtjen e maskave dhe distancim fizik në të gjitha godinat federale, pronat federale dhe nga të gjithë punonjësit federalë dhe kontraktorët e ndryshëm”, tha për gazetarët Jeff Zients, këshilltar i Biden për pandeminë.
“Presidenti do t’i bëjë thirrje të gjithë Guvernatorëve, zyrtarëve të shëndetit publik, kryetarëve të bashkive dhe drejtuesve të bizneseve që të vënë në zbatim mbajtjen e maskave, distancimit fizik dhe ekzekutimin e masave të tjera për kontrollin e Covid-19”, shtoi Zients. “Ky nuk është një qëndrim politik, por ka të bëjë me shëndetin e familjeve tona, rimëkëmbjen ekonomike dhe ringritjen e kombit”.
Presidenti në ikje Trump refuzonte në mënyrë demonstrative të mbante maskë.
