Operatori i Shpërndarjes së Energjisë Elektrike (OSHEE) paraqiti së fundmi një kërkesë zyrtare pranë Bankës Europiane për Rindërtim dhe Zhvillim (BERZH) për një hua të re prej 70 milionë eurosh.
Kredia që pritet të aprovohet në 21 mars të këtij viti vjen si një kërkesë e ndikuar nga kriza që ka shkaktuar COVID-19 por edhe nevoja për të vijuar me investimet dhe konkretisht me projektin e nënstacionit në Tiranën qendrore.
Referuar dokumenteve të publikuara nga BERZH kredia do të jetë e ndarë në dy transhe.
“Ky projekt do të jetë i strukturuar në dy transhe ku 55 milionë euro do të përdoren nga OSHEE për të lehtësuar shtrëngimet e likuiditetit që shkaktohen nga kriza e COVID-19 dhe një transh tjetër 15 milionë euro që do të përdoret nga OSHEE për të financuar ndërtimin e një nënstacioni 110/20kv në zonën qendrore të Tiranës” nënvizon BERZH.
OSHEE argumenton në kërkesën e saj se lehtësia e propozuar e likuiditetit do të rrisë qëndrueshmërinë e sektorit ndaj goditjeve sistemike si rezultat i krizës Covid-19. Lehtësia e propozuar është strukturuar për të siguruar që kapaciteti kyç i pagesës dhe likuiditetit të mirëmbahen dhe të kalojnë në zinxhirin e furnizimit të OSHEE.
“Për më tepër, OSHEE do të krijojë një qendër trajnimi profesional për të ofruar programe trajnimi me cilësi të lartë dhe për të gjetur punonjës të rinj në rajonet që shërbehen më pak sesa standardi. Gjatë periudhës katërvjeçare të së ripagimit, rreth 140 të rinj do të fitojnë aftësi të akredituara në lidhje me tregun me qëllim që të arrijnë të paktën të ketë 35% femra si pjesëmarrëse. Projekti do të përfshijë bashkëpunim të ri me institutet lokale të arsimit dhe formimit profesional ose kolegjeve teknikë. Projekti gjithashtu do të mbështesë dialogun e politikave për të promovuar arsimin “thuhet në dokument.
Banka në fund të prezantimit të projektit nënvizon se do të mbështesë OSHEE me asistencë teknike për të mbështetur: i) përmirësimin e proceseve dhe qeverisjes anti-korrupsion, ii) përmirësimin dhe forcimin e procedurave të shëndetit dhe sigurisë dhe sistemit të menaxhimit, iii) rritjen e aftësive teknike përmes ofrimit të trajnimit, dhe iv) përgatitjen i një udhërrëfyesi të rrjetit inteligjent për OSHEE.
Kjo është mbështetja e dytë e madhe që OSHEE kërkon nga një institucion financiar pas kredisë së dhënë vite më parë nga Banka Botërorë në nivelin 150 milionë dollar dhe që kishte në plan të parë rimëkëmbjen e sektorit energjetik. /Monitor.al/
