Lëvizja Vetëvendosje me qendër në Shqipëri kujton masakrën e Reçakut të ndodhur më këtë ditë të vitit 1999. Në një deklaratë, Vetëvendosje ripërsërit kërkesën drejtuar Kuvendit të Shqipërisë që të miratojë rezolutën që dënon gjenocidin e Serbisë ndaj shqiptarëve, në linjë me rezolutën e Kuvendit të Kosovës.
VV kujton po ashtu se PS ka dalë kundër kësaj kërkese.
Vetëvendosje shprehet se miratimi i kësaj projekt-rezolute për momentin ka mbetur peng e vullnetit të munguar të shumicës parlametare në Shqipëri.
“Kryeministri Edi Rama dhe Kryetari i Grupit Parlamentar të Partisë Socialiste, Taulant Balla, janë shprehur publikisht se nuk ka nevojë për miratimin e kësaj projekt-rezolutë, m.q.s Kuvendi i Shqipërisë ka kaluar disa rezoluta në vitet 1998-2001. Mirëpo, në projekt-rezolutën e dorëzuar më 8 dhjetor 2020, Lëvizja VETËVENDOSJE! Qendra në Shqipëri u është referuar rezolutave të mëhershme të Kuvendit të Shqipëri dhe ka shpjeguar edhe publikisht se rezolutat e mëhershme nuk adresojnë çështje të rëndësisë jetike lidhur me këtë krim ndaj njerëzimit”, deklaron VV.
