Kolegji i Posaçëm i Apelimit ka shkarkuar nga detyra ish-Kryetaren e Gjykatës së Gjirokastrës, Albina Spaha. Vendimi nga KPA është marrë më 12 janar, ndërsa Spaha kishte apeluar më parë vendimin e KPK-së, që e shkarkonte nga detyra.
Në njoftimin e KPA thuhet se trupi gjykues i Kolegjit i kryesuar nga Albana Shtylla me relatore Rezarta Schuetz dhe Ina Rama, Natasha Mulaj, e Sokol Çomo anëtarë, pasi shqyrtoi në dhomë këshillimi ankimin e Albina Spahas vendosi në mënyrë unanime të lërë në fuqi vendimin e KPK duke e larguar atë përfundimisht nga sistemi i drejtësisë.
Albina Spaha u shkarkua nga detyra më 15 prill 2019. Sipas KPK, shkarkimi i saj u bazua te mungesa e burimeve financiare të ligjshme për blerjen e një apartamenti si dhe deklarimi i pamjaftueshëm në kriterin e pasurisë.
Kryegjyqtarja e Gjirokastrës u penalizua edhe nga punësimi i bashkëshortit si ekspert në Gjykatën Administrative, i vlerësuar nga trupa gjykuese në kundërshtim me legjislacionin tatimor.
