Edhe këtë mëngjes, kryeministri Edi Rama e ka nisur ditën me një postim propagandistik në faqen e tij në FB.
Kreu i qeverisë poston pamje të një zone të Vlorës në kohë të ndryshme, me atë të cilave rreket të vërë në dukje se qeveria aktuale ka bërë investime në mënyrë që të shmangë përmbytjet.
“Me këto pamje nga e njëjta rrugë në zonën historike të Vlorës, marrë nga i njëjti kënd pas të njëjtave reshje shiu, duke u thënë të gjithë atyre që përqeshnin këto ditë ‘përmbytjen’ e Vlorës (apo në përgjithësi atyre që s’e bëjnë dot dallimin mes të sotmes e të djeshmes kur bie shi), se është koha për ta freskuar pak kujtesën, si edhe duke i garantuar të gjithë se edhe në këtë drejtim, më e keqja ka ikur ka kohë pas krahëve tona dhe më të mirën e kemi të gjithën përpara (e do ta arrimë me edhe më shumë punë akoma)”, shkruan Rama në komentin që shoqëron pamjet.
Reagimi vjen pasi javën e kaluar, shumë rrugë e lagje në Vlorë ishin nën ujë për shkak të përmbytjeve. Mes tyre madje edhe zona ku është investuar së fundmi nga pushteti. Këtë fakt si dhe përmbytjet në zonat e tjera të vendit, kryeministrit ja sjellin në kujtesë qytetarët përmes komenteve në statusin e tij.
“Avash o kry kryeinxhinier, hajde një xhiro ne Vlorë kur të bjerë shi prap”, shkruan dikush. “Po me ato vendet që vete Basha për të gjujt ngjala c’bëhet z kryeministër”, komenton një tjetër.
Të tjerë, ndërkohë, vënë në dukje propagandën e Ramës.
“Ke gabu profesion z. Kryeminister? Do të ishe një regjisor i shkëlqyer”, shkruan një qytetar.
