Kryeministri Edi Rama i ka bërë jehonë në rrjetet sociale nisjes së vaksinimit kundër Covid-19 në Shqipëri. Nën moton “Shqipëria buzëqesh”, Rama shkruan se sot hyn faza e ofensivës së madhe për largimin përfundimtar të “armikut të padukshëm”.
Njoftimi për nisjne e vaksinimit u bë mbrëmjen e djeshme po nga Kryeministri, ndërsa u duk se e gjithë kjo fushatë kishte si synim të sfumonte akuzat ndaj qeverisë lidhur me dështimin për përballimin e situatës së përmbytjeve, por edhe një skandali, kur dy nga ministrat e tij, Arben Ahmetaj dhe Belinda Balluku, u shfaqën në një darkë luksoze në një prej restoranteve më të shtrenjta në Dubai.
E ndërsa rrjetet sociale anatemonin ministrat dhe shpërthyen memot ndaj tyre dhe Kryeministrit, Rama postoi një njoftim të shkurtër mbi nisjen e vaksinimit, por pa dhënë më shumë detaje. Pak e çuditshme kjo për një qeveri, e cila kalon pa show dhe propogandë mbërritjen e vaksinave në Shqipëri, në një kohë kur gjithçka bazohet në propogandë dhe show, pavarësisht rëndësisë që ka.
Më parë është deklaruar se gjatë 1 ore në stadiumin “Air Albania” do të vaksinohen 60 persona në orë, ndërkohë që vendet e vaksinimit do të jenë të hapura 10 orë, çka do të thotë se në një nga bokset e vaksinimit mund të vaksinohen deri në 600 persona në ditë.
“MIRËMËNGJES
dhe pak orë nga nisja e fushatës së vaksinimit #ShqipëriaBuzëqesh duke ju marrë pak minuta nga koha juaj, për të hedhur vështrimin pas në orët, minutat, ditët, javët e muajt e jashtëzakonshëm të luftës me Armikun e Padukshëm, e cila sot hyn në fazën e ofensivës së madhe për largimin e tij përfundimtar nga jeta jonë, ju uroj një javë të mbarë””, shkruan Rama në rrjet.
