Ambasadorja, Yuri Kim, ka risjellë në vëmendje betimin që ajo ka bërë 1 vit më parë, kur zyrtarisht mori edhe detyrën e diplomates në Tiranë se do të mbronte Kushtetutën e SHBA kundër armiqve të brendshëm e të huaj!
“1 vit më parë – në prani të miqve & familjes, me dorën mbi një Bibël të nënshkruar nga nëna ime – u betova se “do të mbështes & mbroj Kushtetutën e SHBA kundër të gjithë armiqve të huaj & të brendshëm. Për nëpunësit publikë të SHBA, Betimi ynë i Shërbimit është i shenjtë”, ka shkruar ajo në faqen e vetë në Twitter, postim që është shpërndarë edhe në rrjetin social Facebook, në faqen zyrtare në Ambasadës së SHBA.
Postimi vjen në një kohë kur në datën 6 janar pati zhvillime të paprecedenta në godinën e Kapitol, atje ku u çertifikua edhe rezultati i zgjedhjeve për Presidentin amerikan.
Joe Biden u shpall fitues i zgjedhjeve, mes kontestimeve të forta të Presidentit Donald Trump, i cili pas zhvillimeve të forta në godinën e Kongresit, ku disa protestues u lejuan të hynin në brendësi të saj, pranoi humbjen.
Kujtojmë se diplomatja Kim është përzgjedhur në postin e Ambasadores së SHBA në Tiranë nga Presidenti Trump. Nuk dihet nëse ky ripostim nga ana e Yuri Kim është thjesht një kujtesë mbi betimin e saj, apo ka lidhje deri diku me zhvillimet që ndodhën në vendin e saj.
