Të paktën 9 prej sirianëve që ndodheshin në gomonen, e cila u shpëtua mbrëmjen e së premtes nga mbytja, janë transportuar drejt spitalit të Traumës në Tiranë për ndihmë të specializuar mjekësore, ndërsa 16 të tjerë po trajtohen në spitalin rajonal të Vlorës.
Disa orë pas operacionit që shpëtoi 50 sirianë që ndodheshin në një gomone që po udhëtonte drejt Italisë, janë zbuluar detaje të reja.
Në gomone ndodheshin 50 klandestinë nga Lindja e Mesme ( Sirianë), të cilët qëndruan mbi 3 orë në përballje në det të hapur me motin e keq.
Ata tentuan të kalonin ilegalisht kufirin drejt Italisë të ndihmuar edhe nga një grup trafikantësh shqiptare.
Mjeti lundrues i tipit gomone mbeti në grykëderdhjen të Vjosës për orë të tëra për shkak të erërave të forta në drejtim jug- perëndim.
Pjesa tjetër e tyre gjenden në korridoret e Drejtorisë Vendore të policisë. Kjo e fundit në komunikatën e saj për shtyp tha se goditi një rast trafiku klandestinësh, pas nje pëgjimi te kryer e megjithatë salla operative u njoftua për një mjet lundrues me shtetas të huaj në bord që kërkoi ndihmë për shpëtim pasi gjendej në grykëderdhjen të Vjosës në rrezik për tu mbytur. Gomonia e përmasave të mëdha është dëmtuar dhe mbytur pjesërisht.
Në aksionin e shpëtimit morën pjesë një mjet lundrues i Rojes Bregdetare dhe dy mjete të Guardia di Finanzas Italiane.
