50 emigrantë sirianë u shpëtuan mbrëmjen e djeshme, ndërsa rrezikonin mbytjen si pasojë e motit të keq. Operacioni është zhvilluar në grykëderdhjen e Vjosës, ku u shpëtuan emigrantët sirianë, mes tyre gra dhe fëmijë, që po tentonin që të iknin me gomone në drejtim të Italisë.
Pavarësisht kushteve mjaft të vështira atmosferike dhe me një det mbi 5 ballë, gomonia ishte gati për t’u nisur për në Itali.
Operacioni nisi pas një telefonate në sallën e policisë Vlorë, ku një person ka kërkuar ndihmë.
“Gomonia po mbytet, ndihmë”, mësohet se ka thënë personi.
Pas kësaj telefonate, strukturat e Vlorës së bashku me rojen bregdetare janë vendosur në lëvizje duke shkuar në drejtim të grykëderdhjes së Vjosës dhe shpëtuar gomonen me 50 klandestinët sirianë.
Ndërkohë që strukturat hetimore të Drejtorisë Vendore të Policisë Vlorë dhe ato të Policisë Kufitare, nën drejtimin e Prokurorisë po vijojnë veprimet për zbardhjen e plotë të kësaj tentative për kontrabandim te emigranteve në rruge detare dhe vënien para drejtësisë të personave përgjegjës.
