Rreth 50 klandestinë nga Lindja e Mesme ( Sirianë) qëndruan mbi 3 orë në përballje në det të hapur me motin e keq, ndërsa policia shqiptare u vu në lëvizje pas një telefonate të mbërritur në sallën operative, ku kërkohej ndihmë. Edhe pse u raportua se policia kishte nën përgjim një grup që po tentonte të trafikonte sirianët drejt Italisë, nuk dihet sepse nuk është ndërhyrë, përpara se gomonia të nisej.
Shumë prej sirianëve në gomone janë në gjëndje të rënduar shëndetësore. Raportohet se në total 25 persona janë transportuar drejt spitalit rajonal të Vlorës, nga të cilët 9 më pas u transportuar drejt spitalit të Traumës në Tiranë.
Mjeti lundrues mbeti në grykëderdhjen të Vjosës për orë të tëra për shkak të erërave të forta në drejtim jug- perëndim.
Xhilal. M, një sirian i cili po shoqëronte të motrën tha se ishte në gomone sëbashku me dy motrat dhe nipin 7 vjeçar.
“Paratë i ka paguar im vëlla , nuk e di sa lek ka paguar, ne donim të shkonim në Itali ….në Europë , kudoqoftë. Kemi qëndruar për rreth 3 orë në det, u dogjëm nga benzina”, shprehet ai.
Pjesa tjetër e tyre gjenden në korridoret e Drejtorisë Vendore të policisë.
Kjo e fundit në komunikatën e saj për shtyp tha se goditi një rast trafiku klandestinësh, megjithatë salla operative u njoftua për një mjet lundrues me shtetas të huaj në bord që kërkoi ndihmë për shpëtim pasi gjendej në grykëderdhjen të Vjosës në rrezik për tu mbytur. Gomonia e përmasave të mëdha është dëmtuar dhe mbytur pjesërisht.
Në aksionin e shpëtimit morën pjesë një mjet lundrues i Rojes Bregdetare dhe dy mjete të Guardia di Finanzas Italiane. Në tokë aksioni për krehjen e territorit dështoi, ndërsa policia nuk arriti të zbardhë dhe ndaloj shqiptarët e përfshirë në trafik.
Burime jozyrtare konfirmojnë ndalimin e dy personave të dyshuar si të përfshirë. Aktualisht nuk ka të dhëna të sakta rreth gomones, nëse rezulton e trafikuar apo e rregjistruar me pronësi të rregullt në shqipëri.
