Moti me reshje të denduara e të vazhdueshme ka sjellë përmbytje në disa zona të vendit.
Në Vlorë, ku ka pasur probleme dhe ditën e djeshme, Vjosa ka dalë nga shtrati dhe ka përmbytur një pjesë të pazarit pranë urës së Mifolit.
Nga Ura e Mifolit, prononcohet kryetari i njësisë Administrative Novoselë
Në Lezhë, ka probleme në bllokun e banimit ’11 janari’ të lagjes ‘Besëlidhja’. Vërshimi i ujit thuajse ka përmbytur totalisht këtë zonë duke bllokuar hyrjet e pallateve e sjellë probleme në lëvizjen e qytetarëve dhe automjeteve.
Reshjet e shiut kanë sjellë probleme edhe në Kallmet të Lezhës, ku kanali i ujërave të larta ka dalë nga shtrati duke përmbytur disa hektarë tokë bujqësore. Lumi Drin po ashtu ka dalë nga shtrati. Në zonën e ish-fruotres në Lezhë, Balldre dhe Gocaj uji ka vërshuar në tokat bujqësore duke përmbytur dhjetra hektarë. Pjesa më e madhe e fushës së Zadrimës është nën pushtetin e ujit. Njësitë Administrative Blinisht dhe Dajç tani janë pa energji elektrike.
Është bllokuar për shkak të reshjeve edhe rruga që lidh fshatin Kallmet në Lezhë me superstradën Lezhë-Shkodër.
Në Shkodër, Rruga e Obotit është e pakalueshme për shkak të lartësisë së ujit 60 cm. Në fshatin Shirq në vendet e quajtura Urrela dhe Mushan, uji ka përmbytur 489 hektarë tokë. Bashkia Shkodër kërkon pajisjen e mjeteve të ushtrisë për lundrimin dhe krijimin e aksesit për banorët e Obotit.
Në Elbasan, ka vazhduar rënia e gurëve dhe inerteve në aksin Gramsh-Moglicë të cilat janë eleminuar nga firma kontraktuese. Po ashtu, ka pasur rrëshqitje të vazhdueshme të dherave në Pishkash.
Shirat e rrëmbyeshëm kanë sjellë probleme dhe në Gjirokastër. Gjatë natës, shirat e dendur kanë bërë që Viroi të dalë nga shtrati e për pasojë të përmbytet një sipërfaqe e konsiderueshme toke.
Ndërkohë, IGJEUM ka parashikuar për reshje të dendura deri më 11 Janar, në thuajse gjithë territorin e vendit.
