Anestezistja Ilaria Donadio, bëri së fundmi vaksinën kundër kovidit. Ajo ka qenë në vijën e parë të luftës me pandeminë, prej muajsh, në një prej vendeve më të goditura nga virusi, Itali.
Ndërsa mori dozën e parë të vaksinës Pfizer/ BioNtech, ajo u shpreh se vetëm në këtë moment, ka kuptuar përse ata që marrin vaksinën anti-kovid, e ekspozojnë atë përmes një fotoje.
Si e përjetoi ajo? Donadio e ka përshkruar si një udhëtim, duke bërë një liste të gjithçkaje që çdo qenie njerëzore i është dashur të heqë dorë, për shkak të pandemisë Covid-19.
“Ndërsa ndjeja se lëngu i vaksinës hynte në trupin tim, kuptova se brenda saj kishte mbi të gjitha puthjet dhe përqafimet e harruara, udhëtime në shkollë, të moshuarit në krye të tryezës ditën e Krishtlindjes, mensa të mbushura me njerëz.
Kishte punë, avionë që largoheshin dhe stacione plot. Valixhe të mbushura, festa në shtëpi që të gjithë të sjellin diçka, festa me pizhame, kërcime e këndim të gjithë bashkë. Kishte kënaqësi, ndërsa i prezantohesh dikujt dhe i jep dorën pa frikë, gjumë të qetë dhe kufij të hapur. Kishte kompjuterë të mbyllur dhe mësues që flisnin duke ecur zigzag mes tryezave.
Shënimet që kalonin nga njëra dorë në tjetrën. Kishte palestër, lëvizje lart e poshtë nën ritmin e muzikës, e më pas torta ditëlindjeje që ne gjithmonë e ndanim në feta bashkë dhe e konsumonim pranë e pranë, pa njohur se ç’është distanca.
Kishte njerëz të moshuar që tregojnë gjithmonë të njëjtën histori dhe gjithmonë në të njëjtën mënyrë, por ju e dëgjoni atë sikur të ishte hera e parë. Kishte një ndjenjë altruizmi sepse vaksina është bërë për veten, por mbi të gjitha për të tjerët dhe ekzistonte ajo ndjenja e paqes që ju kap, kur jeni duke punuar për të gjithë. Kjo është arsyeja pse ata që vaksinohen e tregojnë atë. Sepse në atë moment kemi pasur një udhëtim të bukur”.
