Edhe pse me një situatë të ngjashme si vitin e kaluar, ku problemet u zgjidhën vetëm në momentet e fundit sa u përket federimit të lojtarëve, sërish drejtuesit e Skënderbeut po punojnë paralelisht për të forcuar ekipin, duke marrë të mirëqenë faktin se merkatoja do të hapet. Goditja e madhe e korçarëve mund të quhet mbrojtësi i majtë, Vangjel Zguro, i cili pas rikthimit nga SHBA do të bashkohet që sot me Skënderbeun. Në lojë për lojtarin pogradecar ishte edhe Vllaznia, por ai zgjodhi të vazhdojë për 6 muaj me Skënderbeun. Lajmin e konfirmoi për gazetën vetë presidenti bardhekuq, Ardjan Takaj. Ky i fundit nuk ka qenë aspak i kënaqur me mënyrën se si u paraqit ekipi në 12 javët e para, për më tepër nga pësimi i golave të shumtë.
Zguro zgjidh një nga problemet në krahun e majtë të prapavijës, duke shtuar jo vetëm cilësinë në ekip, por edhe eksperiencën. Prej dy sezonesh ai ka luajtur në Amerikë, fillimisht me Red Volves dhe më pas me Tuslën në Ligën e Dytë. Trajneri Julian Ahmataj e ka pasur Zguron kur drejtonte Kamzën, ndërkohë që pogradecari ka shkëlqyer me Luftëtarin.
Ndërkohë, një tjetër përforcim i korçarëve është edhe 25-vjeçari Kristi Marku, i cili vjen pas një aventure të mbyllur në Armeni me Pjunik Jerevan. Sezonin e kaluar qendërmbrojtësi luajti 16 ndeshje me armenët. Në të kaluarën ai ka qenë pjesë e Teutës, Partizanit, Flamurtarit dhe Lushnjës.
Afrimi i radhës është edhe Leard Sadriu. Mbrojtësi kosovar, i lindur në Ferizaj, vjen nga Shkëndija e Tetovës. Bëhet fjalë për një lojtar që mund të luajë në qendër dhe në krahun e majtë të këtij reparti. Sadriu është vetëm 21 vjeç dhe pas aktivizimit te Ferizaj në vitin 2018, më pas u transferua te Shkëndija, por duke pasur pak hapësirë.
/Panorama Sport/
