Ditën e djeshme, Partizani, fitoi gjyqin në CAS dhe tashmë është e lirë të transferojë apo të largojë lojtarë.
Duke marrë këtë lajm, pritet që skuadra e drejtuar nga Ilir Daja, të ndërhyjë në treg për të përforcuar organikën. Partizani ishte në bisedime të avancuara me disa futbollistë gjatë merkatos së verës, para se të vinte vendimi nga CAS për bllokimin e merkatos.
Me ardhjen e trajnerit Daja në gusht të vitit që lamë pas, priteshin edhe disa prurje futbollistësh. Eni Imami ishte një prej tyre, me mbrojtësin që ishte dhe pjesë e ekipit të kuq në Ohër gjatë fazës përgatitore. Një tjetër futbollist që ishte pjesë e “demave” në Maqedoni, ishte dhe sulmuesi Adonis Aliu. Imami nënshkroi për Vllazninë në verë, ndërsa Aliu aktivizohet për Llapin në Kosovë.
Një tjetër emër për prapavijën, ishte ai i Renato Arapit. Kapiteni i Teutës është një ndër të preferuarit e Dajës, por tashmë vështirë të largohet nga “djemtë e detit” në mes të sezonit. Një emër tjetër për prapavijën, ishte ai i Franci Lalas. 21-vjeçari po bën një sezon shumë të mirë me Korabin në Kategorinë e Parë, ku ka shënuar edhe tri gola. Një mbrojtës me të ardhme.
