Britania vendosi izolimin e saj të tretë ditën e martë, duke bërë përpjekjen e fundit kundër pandemisë Covid-19. Ndërkohë, pritet që fushata masive e vaksinimit të ndryshojë rrjedhën e situatës.
Kryeministri Boris njoftoi izolimin duke thënë se mutacioni i Covid-19 po përhapet me ritme të shpejta dhe se sistemi shëndetësor rrezikon mbingarkim brenda 21 ditëve të para të janarit
Shteti anglez është një ndër vendet e prekura më shumë nga koronavirusi, me numrin e dytë më të lartë të vdekjeve në Europë dhe me ekonominë që pësoi tkurrjen më të mprehtë gjatë valës së parë të virusit pranverën e kaluar.
Vetëm në Angli, rreth 27,000 njerëz janë të shtruar në spital me Covid-19, 40% më shumë se gjatë pikut të parë në Prill, me numrin e infeksioneve që pritet të rritet akoma më shumë pas festive të fundvitit.
Një sondazh i Savanta-ComRes i realizuar menjëherë pas fjalimit të Johnson tregoi që katër në pesë persona në Angli mbështesin izolimin si masë kundër virusit.
Sipas rregullave të reja në Angli, shkollat janë të mbyllura për shumicën e nxënësve, njerëzit duhet të punojnë nga shtëpia nëse është e mundur dhe të gjitha dyqanet jo-thelbësore janë të mbyllura.
Ndërkohë, më shumë se një milion njerëz në Britani tashmë kanë marrë dozën e tyre të parë të vaksinës COVID-19. Qeveria synon të vaksinojë të gjithë banorët e shtëpive të kujdesit për të moshuarit dhe kujdestarët e tyre, të gjithë mbi moshën 70 vjeç, të gjithë punonjësit e linjës së parë shëndetësore dhe të kujdesit shoqëror dhe të gjithë ata që janë klinikisht jashtëzakonisht të prekshëm. /Reuters
