Aktori i njohur, Xhemil Tagani është ndarë nga jeta në moshën 75-vjeçare. Lajmin e kanë njoftuar miq dhe dashamirës të aktorit përmes postimeve ngushëlluese në rrjetet sociale.
Xhemil Tagani u lind në 6 Shkurt të vitit 1945. U dallua për zërin e tij karakteristik dhe interpretimin profesional të karaktereve.
Diplomohet në vitin 1967 në Shkollën e Lartë për Aktorë “Aleksandër Moisiu”, dega “Aktrim”. Fillon punë si aktor në 1968 në Teatrin Popullor dhe mbetet pjesë e organikës së këtij institucioni derisa del në pension. Ka interpretuar mjaft role të dyta dhe episodike. U shqua për aftesitë e tij për të krijuar karaktere të mevetësishme, më së shumti të këqyrura nga anët komike e sarkastike të tyre, mbushur me vese, huqe, mangësi fizike e shpirtërore apo me gazmend, hare e shpoti pa të keq.
Veti të tilla u vune re në rolet që luajti në shfaqjet “Fytyra e dytë”, “Nen dritat e skenës”, “Duke u gdhirë viti 145, “Monserrati”. “Komunistët”, “Shtëpia me dy porta” e të tjera shfaqje.
Për disa nga rolet e tij më të arrirë përmendim: Samiu tek “Kështu të dua”, Selimi tek “Bashkë me Agimin”, Peç Mblloçi tek “Lumi i vdekur”, Tushka tek “Një nuse për Stasin”, Thomai tek “Nën dritat e skenës” , Alqi tek “Studentja e vitit të fundit”, Reizi tek “Duke u gëdhirë viti 1945”, Agroni tek “Shokët”, Uçi tek “I pazvëndësueshmi”, etj.
