Kryeministri britanik Boris Johnson, ka lajmëruar një izolim (lockdown) të ri, i cili fillon pas mesnatës dhe pritet të zgjasë deri në mes të shkurtit. Ky është izolimi i tretë në rang kombëtar, që prej fillimit të pandemisë.
Qytetarët në Angli janë udhëzuar të qëndrojnë në shtëpi, përveç pak rasteve që bëjnë përjashtim nga ky rregull, në përpjekje për të kontrolluar përhapjen e koronavirusit.
Ky izolim i ri, vjen pas përhapjes masive të koronavirusit dhe shifrave shumë të larta të infektimeve së fundmi, pas evidentimit të një varianti të ri të koronavirusit, 70% më infektues se i pari.
Të gjitha shkollat dhe kolegjet do të mbyllen dhe nxënësit do të mësojnë në distancë.
Ditën e sotme, Mbretëria e Bashkuar ka patur 50 mijë raste të reja infektimesh dhe 407 të vdekur, si pasojë e Covid-19.
Izolimi i ri, është i ngjashëm me atë të marsit të vitit 2020. Qytetarët mund të dalin nga banesat, për arsye mjekësore, për të kryer aktivitet fizik dhe për të blerë ushqime në supermarket. Gjithashtu, personat që nuk mund të punojnë nga shtëpia, mund të lënë banesën për të udhëtuar drejt vendit të punës.
Gjatë periudhës së izolimit, studentët në universitete nuk do të rikthehen në auditore dhe do të zhvillojnë mësime online, ndërkohë provimet e fundit të vitit akademik nuk do të zhvillohen normalisht.
Ndeshjet e Premier League do të vijojnë, por sportet për ekipet amatore, nuk janë të lejuara. Gjithashtu të gjitha ambjentet sportive, si fushat e tenisit, golfit dhe palestrat, do të mbyllen.
Në Mbretërinë e Bashkuar vijon vaksinimi i të moshuarve dhe grupeve vulnerabël. Ndërkohë, ditën e sotme ka filluar vaksinimi edhe me vaksinën e AstraZeneca.
Kryeministri Johnson ka deklaruar se në tre muajt e ardhshëm, në MB do të vaksinohen dhjetëra milionë qytetarë.
