Prokuroria e Tiranës ka ndryshuar akuzën ndaj Përparim Ademit, i cili ekzekutoi brenda banesës së tyre dy motra, në ditën e fundit të vitit 2020. Fillimisht ndaj Ademit u ngrit akuza e “vrasjes në rrethana cilësuese”, ndërsa sot, sipas avokatit mbrojtës, Arben Gramo, iu komunikua akuza “vrasje për shkak të marrëdhënieve familjare”.
Avokati, në një prononcim për mediat, pasi gjykata caktoi masën e sigurisë arrest me burg për Ademin, 59 vjeç, tha se gjendja e klientit të tij, i cili vrau dy motrat është e rënduar dhe se e ka pranuar krimin edhe në gjykatë.
“Gjykata pranoi kërkesën e prokurorit. Është një ndër veprat më të rënda të Kodit Penal. Vetë personi e ka pranuar. Për cilësimin ligjor nuk kemi qenë dakord. Është akuzuar fillimisht për vrasje në “rrethana cilësuese”. Ai është i martuar, shoqëria jonë nuk e pranon poligaminë dhe cilësimi ligjor duhet të jetë në bazë të nenit 79.
Prokuroria ka ndryshuar versionin, e cilëson vrasje për shkak të marrëdhënieve familjare. Ai i ka pranuar të gjitha versionet.
Në vazhdimësi do të shikojmë, është i rënduar nga ana psikologjike. Shëndeti i tij nuk është i mirë. Për këtë fazë kaq mund të them”, tha ai.
Si ndodhi krimi?
Paraditen e 31 dhjetorit, në zonën e Astirit në Tiranë, u ekzekutuan me një armë automatike, dy motra. Autori Përparim Ademi, një shqiptar nga Maqedonia e Veriut, para se të ngjitej në apartament, ka marrë njërin nga fëmijët që po luante poshtë pallatit duke e përdorur si karrem për të hyrë brenda.
Dy motrat Kristina Bardhi dhe Zhaneta Metani ishin duke ngrënë bukë. Në momentin që është hapur dera dhe motrat kanë parë që është Ademi, kanë tentuar të mbyllin derën. Menjëherë 59-vjeçari Përparim Ademi ka hapur zjarr, fillimisht në derë dhe pastaj në drejtim të motrave.
Në vendin e ngjarjes janë gjetur 26 gëzhoja plumbash, ndërsa vetëm 5 prej tyre kanë qëlluar motrat Kristina dhe Zhaneta. Pasi ka kryer krimin, 59-vjeçari ka qëlluar nëpër muret e banesës, më pas ka lënë armën tip automatik kinez dhe është larguar nga vendi i ngjarjes.
Dëshmitë
Përparim Ademi, 59-vjeç, i njohur edhe me mbiemrin Tela ka pranuar që para 20 vitesh ka nisur një marrëdhënie jashtëmartesore me Kristinën. Pas ndarjes me këtë të fundit, është lidhur me motrën tjetër Zhanetën.
Po ashtu, 59-vjeçari ka martesë ligjore me një grua tjetër, e cila ka pranuar se i dinte lidhjet e të shoqit, madje kishte krijuar miqësi me dy motrat që të mos prishte familjen. Ajo ka shtuar se ka pasur hyrje dhe dalje familjare me ta, madje edhe kanë udhëtuar së bashku. Përparim Ademi, para gjyqtarit Gend Hoxha, ka pretenduar se ka një fëmijë me njërën prej motrave, por që nuk e ka regjistruar në emrin e tij.
Përparimi ka pranuar se krimi ndodhi për arsye xhelozie sepse kishte dyshime se Zhaneta kishte një marrëdhënie me dikë tjetër.
Vrasja ndodhi më 31 dhjetor, në rrugën Bajram Tusha në Astir. 59-vjeçari Përparim Ademi i qëlloi për vdekje me kallashnikov të dy motrat, Kristinën dhe Zhanetën.
Policia i gjeti të dy motrat në banesë pa shenja jete, ndërsa në vendngjarje u gjetën 26 gëzhoja kallashnikovi. Pas vrasjes, Ademi u largua me këmbë nga vendngjarja, ndërsa u arrestua 2 orë pas krimit.
