Dy gra janë gjetur të pajeta këtë të Enjte, brenda një apartamenti në zonën e “Astirit”, në kryeqytet. Viktimat janë dy motra që janë qëlluar me armë zjarri nga një 59-vjeçar, bashkëjetuesi i njërës prej grave.
Në njoftimin paraprak lidhur me ngjarjen, policia sqaron se rreth orës 10:30, Përparim Ademi, 59 vjeç, dyshohet se gjatë një konflikti të çastit, ka qëlluar me armë zjarri bashkëjetuesen e tij dhe motrën e saj, të cilat si pasojë e plagëve të marra kanë ndërruar jetë.
Pas krimit, autori është larguar nga apartamenti. Dyshohet se ia mbathi nga vendngjarja me një automjet tip “Volkswagen” ngjyrë blu.
Pas marrjes së njoftimit, në vendngjarje kanë shkuar forca të shumta policie, të cilat kanë rrethuar zonën, me qëllim kapjen e autorit.
“Janë ngritur pika kontrolli në të gjitha akset rrugore dhe vijon puna nga grupi hetimor, nën drejtimin e Prokurorisë, për sqarimin dhe dokumentimin e plotë të rrethanave të ngjarjes”, njoftoi policia.
