Emigrantët, referuar ndryshimeve në Kodin Zgjedhor, kanë të drejtë që të votojnë për zgjedhjet e 25 prillit, nga vendet ku ata jetojnë dhe punojnë.
Vetëm pak ditë më parë, ministri i Diasporës Pandeli Majko, ndezi debatin mbi të drejtën e votës së emigrantëve, të cilët ende nuk kanë deklaruar adresën e tyre të banimit.
“Është krijuar një kakofoni. Duket sikur po të mos kesh deklaruar adresën, ti nuk merr të drejtë të votosh. Nuk është kështu. Në KQZ do regjistrohen drejtpërdrejt. Sistemi që do të krijohet pranë KQZ-së, sipas modelit të një shteti më të ri të rajonit, Kosovës, është me aplikim sipas shtetasve tanë jashtë vendit, të cilët aplikojnë me pasaportë apo me kartë identiteti dhe kjo krijon listën e votuesve dhe jo e kundërta”, tha Majko në një mbledhje në Komisionin për Diasporën dhe Emigrantët, më datë 21 dhjetor.
Menjëherë pas saj, foli dhe Komisioneri Shtetëror i Zgjedhjeve Ilirjan Celibashi i cili u shpreh se emigrantët mund të votojnë duke deklaruar vendbanimin e tyre përmes portalit e-albania dhe se asnjë emigrant vendbanimi i të cilit nuk është i regjistruar nuk mund të ketë të drejtën për të votuar.
Por ministri Majko në një postim në rrjetet sociale ka sqaruar qëndrimin e tij në lidhje me këtë çështje duke u shprehur se deklarata e tij është keqkuptuar.
“Ndryshimi i Kodit Zgjedhor e ka bërë votimin e shtetasve shqiptarë jashtë vendit një detyrim ligjor.
Nga përfaqësues të strukturave të Komisionit Qëndror të Zgjedhjeve po vinë deklarime kontradiktore. Dje anëtari i KAS (Komisioni i Ankimimeve dhe Sanksioneve) bëri në media komentin se “…Objektivisht është e pamundur vota e emigrantëve në zgjedhjet e 25 prillit.
Sepse nuk ka një regjistër për të treguar se kush është regjistruar ku. Sepse vota hidhet aty ku je regjistruar dhe jo ku banon. Aludimi për mohimin e të drejtës së votës së shtetasve jashtë vendit me arsyetimin e mosregjistrimit të adresës është i qartë në paqartësi”, shprehet Majko.
Sipas tij, çdo emigrant që ka marrë kartë apo pasaportë biometrike ka të drejtë të aplikojë për ndryshim vendbanimi në regjistrin e gjendes civile. Majko gjithashtu ka sqaruar dhe deklaratën e tij, shkëputur nga mbledhja e komisionit për diasporën në 23 dhjetor.
“Me shkresën e datës 23 dhjetor, Komisioni Qendror i Zgjedhjeve ju drejtua me shkresë Drejtorisë së Gjendjes Civile për identifikimin e shtetasve që banojnë jashtë vendit.
Kjo është një lëvizje e duhur ligjore e Komisionit Qendror të Zgjedhjeve. Ajo vlerëson se e drejta e votës lidhet VETEM me regjistrin e gjendjes civile. Çdo tentativë për të bllokuar aplikimin e të drejtës së votës të shtetasve jashtë vendit me justifikimin se nuk janë regjistruar “të gjitha” adresat do të ishte moszbatim i një detyrimi ligjor të Kodit Zgjedhor.
Një koment i imi në mbledhjen e fundit të nënkomisionit të diasporës dhe migracionit u hoq nga konteksti në disa media dhe më nxori në “konkluzionin” e çuditshëm se “… votimi nuk ka nevojë për regjistrimin e adresave…”(!) Në Kuvendin e Shqipërisë është i regjistruar i gjithë procesverbali e mbledhjes në fjalë. Ky fakt më “përplasi”, sipas medias, edhe me kryetarin e Komisioni Qendror i Zgjedhjeve.
Padiskutim, adresa jashtë vendit është e nevojshme për votimin pasi aty do të trokasin për të marr zarfin e votës”, shprehet Majko
Ndërkohë ministri i Diasporës nxjerr në pah dhe problemet që duhet të marrin zgjidhje në lidhje me votimin e shtetasbve shqiptarë që punojnë apo jetojnë Shqipërisë.
“Me trajtimin sipërfaqësor të Ligjit Nr. 14/2016 imagjinoni që një shtetasi që sapo ka marrë pasaportën, përshembull në Greqi, ti kërkosh të aplikojë sërish tek e-albania për të pasur të drejtën e votimit…(!)
Kush kërkon një regjistrim të ashtuquajtur të “plotë” të adresave të shtetasve jashtë vendit për tu “dhuruar” pastaj të drejtën kushtetuese të votës gabohet. E drejta dhe procedura nuk kanë konflikt. Regjistrimi i “plotë” i adresave do kthehet shpejt në një çështje e cila do të diskutojë edhe vetë kredibilitetin e zgjedhjeve.
Pas ndryshimit të Kodit Zgjedhor, shtetasit të cilët konfirmohen nga regjistri i gjendjes civile se banojnë jashtë vendit duhet të largohen nga listat zgjedhore të votuesve brenda vendit.
Shtetasit që banojnë jashtë vendit, janë subjekt i një liste tjetër zgjedhore. Nga kjo listë, do të krijohet lista e votuesve jashtë vendit. Ajo do të krijohet pasi çdo shtetas nga lista e shtetasve jashtë vendit aplikon personalisht pranë Komisionit Qendror i Zgjedhjeve. Në këtë aplikim, sërish, do të jetë detyruese adresa e banimit jashtë vendit”, sqaron Majko.
