Izraeli po kryen vaksinimin e njerëzve për koronavirusin me ritme të shpejta. Për 10 ditë, janë vaksinuar gjysmë milioni njerëz, që sipas statistikave rezulton se 1 në 20 izraelitë janë mbrojtur nga sëmundja.
E përditshmja gjermane “Bild” shkruan: “Mbajtësi i rekordit botëror: Pse Izraeli po arrin të vaksinojë shumë më shpejt se ne?”, pasi Gjermania kishte arritur të vaksinojë vetëm 21,000 njerëz për 24 orë.
Nëse vazhdon në këto ritme, shteti hebre shpreson të ketë vaksinuar 2/3 e popullsisë (pa llogaritur fëmijët nën 16 vjeç) deri në fund të marsit. Procesi filloi për herë të parë më 20 dhjetor me injeksionet e para tek kategoritë më të rrezikuara, përfshirë mësuesit dhe stafin mjekësor.
Vaksinat që janë përdorur deri tani i përkasin kompanisë amerikane Pfizer.
