Sot në orën 13:45 luhet takimi Laçi-Partizani i vlefshëm për javën e 12-të të Kategorisë Superiore.
Ndeshja e fundit e vitit për skuadrat nga ku do të kërkojnë rezultatin maksimal. Partizani vjen në këtë transfertë pas dy fitoreve radhazi ndaj Kastriotit dhe Kukësit.
Për këtë takim, Daja, me rikthimin e tij në stol është i detyruar të bëjë ndryshime në formacion. Me shumë gjasa, strategu do u besonte 11 futbollistëve që mposhtën Kukësin me rezultatin 4-1, por do t’i duhet të bëjë pa shërbimet e Solomon, që ka plotësuar numrin e kartonëve dhe ka mbyllur vitin. Edhe zv.kapiteni Belica është në dyshim, por duket se Broja ka qenë zgjidhja e duhur si qendërmbrojtës.
Ndërsa sa i takon krahut të majtë të sulmit, aty ku është aktivizuar Solomon këtë sezon, ka mbetur një boshllëk. Me shumë gjasa, Daja mund t’i besojë të riut Tedi Cara, që ka shënuar një gol këtë sezon në Superiore dhe ka fituar dy penallti, pikërisht në dy sfidat e fundit, kundër Kastriotit dhe Kukësit. Ndërsa në stol mund të kthehet braziliani Melo, i cili nuk u grumbullua në dy sfidat e fundit.
Nga ana tjetër vendasit e Laçit do të kenë dy mungesa të sigurta në ndeshjen e sotme ndaj Partizanit në orën 13:45. Bëhet fjalë për sulmuesin Kirian Nuabueze, i cili është kthyer në një problem madhor për klubin. Edhe pse është stërvitur me grupin ditët e fundit, ai nuk do të jetë i gatshëm as kundër të kuqve. Ndërsa mungesa tjetër është ajo e mbrojtësit të majtë, Rudolf Turkaj, i cili është dëmtuar në dorë prej tri javësh.
Formacionet e mundshme:
Laçi:3-5-2: Sherri, Selmani,Ignjatovic, Obanor, Marku, Deliu, Shehu, Lushkja, Musta, Harmon, Xhixha
Partizani: 4-1-4-1: Hoxha, Idrizaj, Bitri, Broja, Hakaj, Kote, Asanim, Mala, Bardhi, Cara, Lukas
