Spitalet në jug të Anglisë po përballen me presionin në rritje, ndërsa numri i pacientëve Covid që kanë nevojë për trajtim rritet.
E shtuna u përshkrua si një nga më të ngarkuarat në histori për Shërbimet e Ambulancës së Londrës, mes përhapjes së shpejtë të një varianti të ri.
Autoritetet u kanë kërkuar njerëzve që të telefonojnë në 999 vetëm nëse kanë urgjencë serioze.
Spitalet në Uells dhe Skoci po raportojnë që shërbimet po përballen me fluks të shtuar nga ndikimi i koronavirusit.
Dr Katherine Henderson tha për BBC se në mëngjes kishte vështirësi të madhe për të futur pacientët në pavijone.
Ajo shtoi: “Shanset janë që ne të përballojmë, por me një kosto, që nuk është ajo që kemi shpresuar”.
“Është gjithmonë sfiduese në dimër, për momentin niveli i nevojës së pacientit është tepër i lartë.”
Shefi ekzekutiv i spitalit Homerton në Londrën lindore u bëri thirrje njerëzve të respektojnë kufizimet e nivelit të katërt që janë në fuqi.
Në një postim në Twitter, Tracey Fletcher shkroi: “Ne jemi jashtëzakonisht të zënë … infermierët dhe mjekët tanë janë duke u kujdesur për pacientë shumë të sëmurë. Askush nuk duhet të nënvlerësojë ndikimin që mund të ketë infeksioni.”
Dr Giri Shankar i Uellsit të Shëndetit Publik tha se sistemi ishte nën presion të madh dhe të paparë, me një numër të madh pacientësh dhe sëmundje të stafit, duke krijuar një situatë “tepër sfiduese”.
Mjekët kanë paralajmëruar se sistemi shëndetësor i Skocisë është i rënduar.
Prof Jackie Taylor, president i Kolegjit Mbretëror të Mjekëve dhe Kirurgëve të Glasgow, tha: “Ne jemi duke parë një numër të konsiderueshëm të pacientëve me Covid dhe rritje të mëdha të infeksioneve të frymëmarrjes standarde dhe urgjencave të tjera që ne shohim në këtë kohë të vitit”
Të dielën, rreth 30,501 infeksione dhe 316 vdekje u regjistruan në Mbretërinë e Bashkuar.
