Rrëfim prekës i trajnerit të Napolit Gennaro Gattuso, i cili javët e fundit është parë me njëri sy të mbyllur.
Ish-lojtari i Milanit dhe kampioni i Botës me Italinë në 2006 flet për sëmundjen e tij në sy, një problem që e ndjek prej vitesh, por që është përkeqësuar javët e fundit.
“As unë nuk kam qenë vetvetja javët e fundit. Besoj se djemtë kanë vuajtur edhe prej kësaj. Dua të bëj një apel të gjithë atyre djemve që nuk duken të bukur. Jeta është e bukur dhe duhet luftuar pa patur frikë, pa u fshehur”.
“Nëse ka patur rezultatet negative është edhe për fajin tim. Qetësohuni se nuk dorëzohem. Unë kam një sëmundje auto-imune, quhet miastenia dhe për të tretën herë brenda 10 vitesh që më ka kapur kjo sëmundje. Syri do të shkojë në vendin e tij dhe unë do të dukem më i bukur. Djemtë më kanë qëndruar pranë, por kam qenë keq, kam patur shumë frikë sepse problemi nuk është se sheh vetëm dopio. Vetëm një i çmendur si unë mund të qëndrojë në këmbë. Sepse nuk është e lehtë të shohësh dopio 24 orë në ditë. Duhet ta pranosh dhe nëse një ditë ndodh të mos jem më, shpresoj të jem në një fushë futbolli”.
Gattuso tregon se edhe kur ishte futbollist i Milanit, në një ndeshje kundër Lazios, kishte kuptuar se kishte një problem të rëndësishëm. “Në fushë shihja 6 Ibrahimoviç dhe 6 Nesta”.
