Kreu i LDK-së, Isa Mustafa, u shpreh sot se kjo parti ende nuk ka përcaktuar kandidatin për Kryeministër, në zgjedhjet e parakohshme, që pritet të mbahen brenda 40 ditësh, pas vendimit të Kushtetueses, që rrëzoi qeverinë Hoti.
“Ne nuk kemi përmend emra, se nuk jemi ulur akoma, ne po presim këto ditë që tani mbi bazën që deklaroi dje kryeministri Hoti që të mblidhet edhe një herë Kuvendi të aprovoj buxhetin dhe marrëveshjet ndërkombëtare që domosdo duhet të miratohen”, ka thënë Mustafa.
Komentet kreu i LDK i bëri me rastin e 31 vjetorit të themelimit të kësaj partie.
Mustafa tha se LDK-ja është krenare për të gjitha arritjet gjatë kësaj periudhe kohore, me vlerat dhe solidaritetin e treguar.
Kur foli për gjendjen aktuale politike, ai tha se fillimisht Kuvendi duhet që të votojë buxheti dhe disa marrëveshje ndërkombëtare për t’i hapur rrugë mbajtjes së zgjedhjeve të parakohshme.
Për vendimin e Gjykatës Kushtuese për rrëzimin e Qeverisë Hoti, ai tha se nuk e kanë pritur, por që do ta respektojnë. Vendim të cilin sipas tij, duhet ta respektojë edhe kreu i VV-së, Albin Kurti nëse i ndalohet kandidimi.
“Të shpallen zgjedhjet, dhe tani do të mbledhin organet tona, do të diskutojmë në mënyrë institucionale jo në bazën e përmendjeve, dëshirave personale, sepse jemi parti institucionale, dhe çdo gjë e çojmë në institucionet dhe organet tona”, ka deklaruar Mustafa.
