Ekipet e ekspertëve italianë, të njohur si RIS, kanë arritur të gjejnë gjurmë në banesën ku jetonte Elona Kalesha, 36-vjeçarja shqiptare, e arrestuar për vrasjen e çiftit Shpëtim dhe Teuta Pasho.
Sipas agjencisë ADN Kronos, ekipet e ekspertëve kanë kontrolluar në banesë për të paktën dhjetë orë.
Pas kontrollit në banesën në Firence, ata janë kthyer në Romë me prova që mund të hedhin më shumë dritë për krimin tronditës.
Kalesha u arrestua një ditë më parë nga karabinierët me urdhër të prokurorisë. Ajo akuzohet për vrasje, fshehje dhe masakrim të kufomave.
Elona ishte vetëm në shtëpi në kohën e arrestit. Ajo nuk iu është përgjigjur pyetjeve të prokurorëve dhe është dërguar në një qeli.
Apartamenti është vendosur nën sekuestro. Hetuesit dyshojnë se çifti Pasho është vrarë në këtë shtëpi nga partnerja e djalit të tyre, Taulantit.
Gruaja mendohet se nuk ka vepruar vetëm. Sipas agjencisë, flitet për të paktën dy bashkëpunëtorë të saj, të cilët nuk janë arrestuar akoma.
Komshinjtë e Elonës kanë dëshmuar se si nga apartamenti i saj vinte një erë e rëndë mishi të prishur. Ata thonë se e kanë parë duke dalë nga shtëpia me qese prej nga rridhte një subsstancë e ngjashme me gjakun.
