Shefi ekzekutiv i kompanisë bioteknologjike gjermane “BioNTech”, Ugur Sahin ka deklaruar se koronavirusi mund të jetë prezent deri në 10 vitet e ardhshme.
Gjatë një konference për shtyp, Sahin tha se koronavirusi mund të mbijetojë për disa vite.
I pyetur se kur besonte se bota mund të ishte në gjendje të kthehej në normalitet, ai u përgjigj: “Na duhet një përkufizim i ri i normales. Virusi do të qëndrojë me ne për 10 vitet e ardhshme. Ne duhet të mësohemi me faktin se do të ketë më shumë shpërthime”.
Ai tha se në realitetin e ri, njerëzit nuk duhet patjetër të izolohen, bizneset nuk duhet të mbyllen dhe shtrirja e njerëzve në spitale nuk duhet të jetë aq e përhapur. “Kjo mund të ndodhë në fund të verës”, tha shkencëtari, duke iu referuar kthimit në normalitet.
Sahin paralajmëroi se vaksinimi i 60-70% të popullsisë mund të mos jetë i mjaftueshëm, nëse virusi përhapet më shpejt.
Kompania tha se është duke kërkuar çdo mundësi për ta zgjeruar prodhimin e vaksinës aq sa është e mundshme. Kapaciteti i saj i prodhimit deri në fund të vitit 2021 është 1.3 miliard doza.
