Mbetet ende e pazbardhur vrasja e efektivit të FNSH-së së Shkodrës, Xhulio Prela. Deri më tani për këtë ngjarje është arrestuar një person, ndërkohë që është në kërkim ndërkombëtar, një person i dytë.
Por burime mediatike bëjnë me dije se në lidhje me këtë ngjarje ka edhe një autor të tretë, ku po punohet për lokalizimin dhe kapjen e tij.
Personi i vetëm i arrestuar lidhur mbi ngjarjen është Nikoll Sherrniku, i cili ditën e nesërme do të dalë para gjykatës për t’u njohur me masën e sigurisë.
Deri tani version i policisë është që Prela dhe autorët janë përplasur për dritat e gjatë të makinës, një version aspak i besueshëm po të kihet parasysh dinamika e ngjarjes dhe përfshirja e shumë personave.
Në dosjen hetimore thuhet se Xhulio Prela, gjatë rrugës për në Tiranë, pasi kishte lënë në fshatin Kosmaç, mikun e tij Pjetër Gavoçin, është larguar nga banesa e tij, në zonën e Gajushit në Milot është shkëmbyer me një automjet tip Fuoristradë.
Gjatë këtij momenti Prela dhe autorët sipas policisë kanë shkëmbyer disa herë ndezjen e dritave të gjata dhe në momentin kur kanë qenë paralel me njëri-tjetrin, i kanë rënë borisë së makinës.
Gjatë këtij momenti dyshohet se midis drejtuesit të mjetit dhe Prelës që udhëtonte me “Volksëagen Passat”, ka pasur shkëmbim ofendimesh.
Pikërisht në këtë moment, efektivi i FNSH-së së Shkodrës, është kthyer nga rruga dhe i është vënë nga pas makinës fuoristradë.
Me të arritur makinën e autorëve, Prela është afruar dhe i ka bërë shenja me drita që drejtuesi i fuoristradës të ndalojë.
Punonjësi i policisë ka qenë i armatosur dhe me sa duket sapo është afruar afër fuoristradës, ka hapur xhamin e djathtë të makinës, dhe ka kërkuar llogari, ndërkohë në dorë ka mbajtur dhe armën e shërbimit.
Burime nga grupi hetimor thonë se Prela ka mbajtur armën në dorë.
Kjo pasi sipas tyre, pistoleta është gjetur në pjesën e poshtme të këmbëve të pasagjerit, që tregon se armën e ka nxjerrë nga brezi.
