Kur aprovimi i vaksinave u duk sikur lehtësoi pak në aspektin psikologjik njerëzit dhe u mendua se pandemisë mund t’i vinte fundi, marrim një goditje tjetër. Anglia ka ngritur alarmin se ka pikasur një variant të ri të Covid-19, i cili ka një transmetueshmëri 70% më të shpejtë se variant normal i këtij virusi.
Anglia e zbuloi variantin e ri të Covid-19 më 13 dhjetor, te personat e prekur me koronavirus. Pacientët nuk kishin versionin normal, por një tjetër version të virusit.
Anglia vuri menjëherë në dijeni OBSH, që e mori me skepticizëm një lajmërim të tillë, por rritja progresive e numrit të të prekurve në Londër ktheu vëmendjen drejt ishullit britanik.
Kryeministri i Anglisë, Boris Johnson, vendosi një mbyllje tjetër të Londrës dhe festat do të kalohen në karantinë. Madje edhe disa shtete të tjera morën vendimin për mbylljen e kufijve me Anglinë.
Ky variant i ri i Covid-19 u diskutua ditën e sotme në emisionin “Shqipëria Live” në Top Channel, ku në lidhje të drejtpërdrejtë nga Zvicra ishte epidemiologu, Taulant Muka.
Mjeku i njohur u shpreh se duhet të bëhen analiza më të thella, përpara se të përhapet paniku te popullsia.
“Ndoshta në zonën ku doli varianti i ri i Covid-19 nuk janë marrë masa si në pjesët e tjera të Anglisë, duhet të interpretojmë të dhënat me kujdes. Vdekshmëria nuk duket më e lartë se sa ajo e Covid të parë. Nga 1 mijë persona kanë ndërruar jetë vetëm 4 vetë, si dhe nuk ka patur shtrime të larta në spital. E në këtë kontekst nuk duhet të kalojmë në panik”, tha Muka.
Sipas tij, lufta me pandeminë e koronavirusit ka treguar se “shpeshherë kemi gabuar, e këto gabime na kanë dërguar në masa ekstreme që kanë patur ndikime në shoqëri”.
Gjithashtu Muka shtoi se shpresë jep vaksina si dhe një pjesë e mirë e popullsisë në botë është prekur nga Covid-19.
