Festat e fundvitit kanë bërë që emigrantë të shumtë të udhëtojnë drejt Kosovës për t’i kaluar këto festa me familjarët e tyre, duke sfiduar edhe rregullat dhe kufizimet e vendosura si pasojë e pandemisë.
Vetëm gjatë ditës së sotme, 41 fluturime do të realizohen nga Zvicra dhe Gjermania drejt Kosovës, ndërsa në aeroportin e Prishtinës ka një fluks të jashtëzakonshëm qytetarësh.
Lajmin për 41 fluturimet e ka bërë të ditur Kryeshefi i Korporatës “Sfidat e Mijëvjeçarit” për Kosovë, Petrit Selimi, përmes një postimi në llogarinë e tij në Twitter.
“Sfida e jashtëzakonshme e pandemisë – turizmi i diasporës. 26 fluturime nga Zvicra vetëm sot për të arritur në Aeroportin e Prishtinës. 15 fluturime të tjera nga Gjermania. Ditëve në vijim: dhjetëra mijëra njerëz tjerë do të arrijnë në aeroportet e Shkupit ose Tiranës ose përmes veturave e autobusëve”, ka shkruar Selimi.
