Shqiptari 42-vjeçar u vra me pesë plumba të shtëna nga një distancë e afër teksa darkonte me një mikun e tij. Kështu raportojnë mediat spanjolle ndërsa shtojnë se vrasësi iu afrua me një qetësi të dukshme, maskuar me një kapuç.
Krimi ndodhi rreth orës 21.30 në restorantin The Orange Tree në El Albir, qendra më e banuar në këtë qytet turistik në rajonin Marina Baixa. Burri i vrarë ishte 42 vjeç dhe po darkonte me partneren e tij në tarracë në kohën kur u qëllua.
Kur ambulanca dhe oficerët e parë të Gardës Civile arritën në restorant, viktima ishte shtrirë në tokë, në gjendje të rëndë për jetën. Mjekët u përpoqën që ta shpëtonin, por shqiptari nuk mundi t’u mbijetojë plagëve.
Arratisja e vrasësit
Dëshmitarët kanë dëgjuar pesë të shtëna dhe më pas kanë parë vrasësin që të largohet me një pistoletë në dorë. Specialistët e Gardës Civile kryen një inspektim në vendin e ngjarjes dhe identifikuan viktimën nga dokumentacioni që mbante dhe informacioni i siguruar nga partnerja
Pista kryesore që Garda Civile po konsideron në lidhje me motivin e vrasjes është larje hesapesh për përfshirjen e pretenduar të viktimës në disa çështje të dyshimta. Hetuesit, raportojnë mediat spanjolle, i kanë përqendruar hetimet e tyre të para në të kaluarën kriminale të shqiptarit.
Agjentët tashmë kanë marrë deklarata nga disa dëshmitarë, siç janë punonjësit e restorantit dhe po përpiqen të gjejnë regjistrimet e kamerave të sigurisë në zonë në mënyrë që të mund të identifikojnë vrasësin.
Një kamerier në një restorant aty pranë i tha agjencisë Efe se një koleg u përpoq të ndihmonte viktimën pasi dëgjoi të shtënat. Ai gjithashtu deklaroi se vrasësi u largua në këmbë, edhe pse më vonë, sipas tij, ai hipi në një automjet.
Banorët dhe tregtarët e Alfàs del Pi kanë frikë se kjo vrasje dhe operacioni i fundit policor kundër mafias ruse mund të ndikojë në turizëm, burimi kryesor i të ardhurave për qytetet e Costa Blanca-s.
Grupet kriminale
Forcat e sigurimit të shtetit kanë goditur vitet e fundit në Komunitetin e Valencias disa grupe kriminale të përbërë nga kriminelë nga Shqipëria dhe Rumania, mes vendeve të tjera, që ishin të “specializuar” në grabitje shtëpish, sulme ndaj kompanive me metodën e “button” dhe trafikim droge.
Nëntorin e kaluar, një operacion i përbashkët i Gardës Civile dhe Policisë Kombëtare rezultoi në shpërbërjen e një grupi kriminal që trafikonte drogë në rajonin Marina Baixa. Agjentët e të dy trupave arrestuan gjashtë individë të kombësive të ndryshme si anëtarë të dyshuar të bandës kriminale.
