Nevil Dede izolon Tiranën para sfidës me Skënderbeun. Trajneri i bardhebluve zhvendosi skuadrën nga “Skënder Halili” në “Selman Stërmasi” që skuadra të stërvitet në fushë me bar natyral dhe përgatitja të mos shihet nga sy të huaj.
Ekipi nisi stërvitjen si zakonisht rreth orës 11:30 dhe askush nuk u lejua që të futej në stadium.
Nevil Dede do të luajë me katër sulmues. Thjesht emrat mund të ndryshojnë. Kështu, në fushë ai do të hedhë Muçin, Sasrakun, Halilin dhe Ismajlgecin që tani luan në krah i avancuar. Me shumë mundësi mund të qëndrojë pushim Agustin Torasa, ndërsa Danso me sa është provuar dje për momentin ka kapur vetëm një vend si rezervë. Sipas asaj që llogariti dje Dede, në portë e nis Bekaj. Mbrojtja me tre, ku luan Vangjeli, Hoxhallari e Najdovski.
Në krahun e djathtë si mesfushor luan Toshevski, ndërsa majtas Ismajlgeci. Në qendër të mesfushës, Toli dhe Batha, ndërsa para tyre Muçi. Në sulm dyshja Sasraku-Halili. Torasa mund të qëndrojë në stol, ndërsa ka edhe opsion B me Torasën në fushë e Halilin djathtas. Dede po shikon të gjitha mundësitë për skuadrën që do të hedhë në fushën e lojës, por dje ka kërkuar nga këta lojtarë maksimumin në stërvitje./ Panoramasport.
Formacioni i mundshëm i Tiranës: 3-4-4: Bekaj, Vangjeli, Najdovski, Hoxhallari, Toli, Batha, Ismaljgeci, Toshevski, Halili, Sasraku, Muçi
